Sabah öz işinə başlayacaq “CTE-2014” sərgisində 11 ölkədən 77 şirkət iştirak edəcək
Bakı, 18 noyabr, AZƏRTAC
Noyabrın 19-dan 21-dək Bakı Ekspo Mərkəzində 5-ci Yubiley Beynəlxalq “Xəzər: ətraf mühit üçün texnologiyalar” sərgisi (“CTE-2014”) keçiriləcək. Bu sərgi Xəzəryanı və Qafqaz regionlarında ekologiya və ətraf mühitin mühafizəsi üzrə keçirilən mühüm tədbirdir. “CTE-2014” sərgisində 11 ölkədən 77 şirkət iştirak edəcək.
AZƏRTAC xəbər verir ki, bu barədə noyabrın 18-də keçirilən mətbuat konfransında sərginin meneceri Jalə Məmmədova məlumat verib. Onun sözlərinə görə, sərgi Azərbaycan Respublikasının Ekologiya və Təbii Sərvətlər Nazirliyi, eləcə də IDEA İctimai Birliyi tərəfindən dəstəklənir. Artıq bu sərginin keçirilməsi ənənə halını alıb. “STE-2014 ” yubiley sərgisi Azərbaycan, Almaniya, Böyük Britaniya, Yunanıstan, Danimarka, İtaliya, İsveç, Rusiya, Serbiya, Türkiyə və digər ölkələrdən gələn şirkətləri bir meydançada toplayacaq. Azərbaycanda keçirilən ekoloji sərgidə ilk dəfə olaraq Çexiyanın milli stendi də iştirak edir. Bu il iştirakçıların 40 faizdən çoxunu debütantlar təşkil edir. Onların arasında həm yerli, həm də xarici şirkətlər var.
Qeyd edilib ki, sərginin sponsoru qismində “Evrascon” şirkəti çıxış edir. Sərgidə yerli şirkətlərin böyük qismini Azərbaycan Respublikasının Ekologiya və Təbii Sərvətlər Nazirliyi, Naxçıvan Muxtar Respublikasının Ekologiya və Təbii Sərvətlər Nazirliyi, Fövqəladə Hallar Nazirliyi, habelə “Təmiz Şəhər” ASC, Alternativ və Bərpa Olunan Enerji Mənbələri üzrə Dövlət Agentliyi, Dövlət Aerogeodeziya Müəssisəsi, Bakı Kartoqrafiya Fabriki, Dövlət Torpaq Kadastrı və Monitorinqi Elm-İstehsalat Mərkəzi, Dövlət Yerquruluşu Layihə İnstitutu və Standartlaşdırma, Metrologiya və Patent üzrə Dövlət Komitəsi kimi qurumlar təşkil edir.
Bildirilib ki, builki sərginin fərqləndirici cəhəti çirkab suların turşulu qatışıqlar və ağır metallardan təmizlənməsi, suvarma üçün kənd təsərrüfatında və istehsalda təkrar istifadə məqsədilə radioaktiv suların təmizlənməsi sistemləri üzrə xarici ekspozisiyaların artmasıdır.
Bölmənin digər xəbərləri
