SABİRABADDA VƏ ƏLİ BAYRAMLIDA YENİ RABİTƏMÜƏSSİSƏLƏRİ AÇILMIŞDIR
Sabirabadda 4528 nömrə tutumu olan elektron avtomat telefon stansiyasının açılış mərasiminin iştirakçıları əvvəlcə ümummilli lider Heydər Əliyevin abidəsinin önünə gül-çiçək dəstələri qoymuş, ulu öndərin xatirəsini ehtiramla yad etmişlər.
Rayon sakinləri adından Sosialist Əməyi Qəhrəmanı Zəminə Aslanova sabirabadlılara göstərilən diqqət və qayğıya görə, Prezident İlham Əliyevə dərin minnətdarlığını bildirmişdir.
Rabitə və informasiya texnologiyaları naziri, akademik Əli Abbasov çıxış edərək, regionların sosial-iqtisadi inkişafı Dövlət proqramının (2004-2008-ci illər) uğurla yerinə yetirildiyini vurğulamışdır. Nazir bildirmişdir ki, dövlətimizin başçısının 2005-ci il 14 oktyabr tarixli Sərəncamı ilə təsdiq olunmuş Azərbaycan Respublikası regionlarının, o cümlədən Əli Bayramlı şəhərinin, Hacıqabul, Kürdəmir, Saatlı, Sabirabad, Ağstafa, Gədəbəy, Qazax, Şəmkir və Tovuz rayonlarının sosial-iqtisadi inkişafının sürətləndirilməsinə dair tədbirlər planına uyğun olaraq Rabitə və İnformasiya Texnologiyaları Nazirliyinin gördüyü işlərdən danışmış, demişdir ki, Sabirabadda bir mərkəzi və 24 kənd avtomat telefon stansiyası fəaliyyət göstərir. Rayonun 53 kəndi telefonlaşdırılmış, ATS-lərin tutumu 1584 nömrə artırılmış, Güdəcühür və Bulaqlı kəndlərində elektron tipli ATS-lər tikilmişdir. Rayonun mərkəzi ATS-nin yenidən qurulması başa çatdırılmış, beləliklə, telefon şəbəkəsinin ümumi tutumu 8140 nömrəyə, elektronlaşdırma səviyyəsi 62 faizə, hər 100 ailəyə düşən telefonların sayı 29,1 ədədə çatdırılmış, uzunluğu 49,6 kilometr olan Əli Bayramlı-Sabirabad fiber-optik kabel magistralı istifadəyə verilmişdir.
Həmin gün nazir Əli Abbasov Əli Bayramlı şəhərində yeni istifadəyə verilmiş 2498 nömrə tutumu olan ATS-ə də baş çəkmiş, burada fəaliyyət göstərən kompyuter zalı və abunə şöbələrinin işi ilə tanış olmuşdur. Bildirilmişdir ki, şəhərdə 10272 nömrə tutumu olan üç ATS tam elektronlaşdırılmış, ATS-lərin tutumu 2405 nömrə artırılmış, REMUT tipli ATS üçün yeni bina tikilmiş, hər 100 ailəyə düşən telefonların sayı 68-ə çatdırılmışdır. Həmçinin ümumi dəyəri 351,6 min manat, uzunluğu 60,1 kilometr olan Ələt-Əli Bayramlı-Hacıqabul fiber-optik kabel magistralı tikilmiş, nəticədə Əli Bayramlı telekommunikasiya qovşağının birbaşa Trans-Asiya-Avropa magistralına qoşulması təmin olunmuşdur.
Həmin gün nazir Əli Abbasov 2006-cı ilin 9 ayı ərzində Rabitə və İnformasiya Texnologiyaları Nazirliyində görülmüş işlərin müzakirəsi ilə əlaqədar Əli Bayramlıda geniş kollegiya iclası keçirmişdir.
Bölmənin digər xəbərləri
