REGİONLAR
Şagirdin yoldaşlarına qarşı kobud rəftarı ilə bağlı hüquq-mühafizə orqanlarına müraciət olunub
Naxçıvan, 3 mart, AZƏRTAC
Şərur rayon Təhsil Şöbəsi tərəfindən müxtəlif sosial şəbəkə ünvanlarında və media saytlarında rayonun Muğancıq Mehrab kənd tam orta məktəbinin şagirdinin digər şagird yoldaşlarına qarşı kobud rəftarı ilə bağlı məlumat yayılıb.
Rayonun Təhsil Şöbəsindən AZƏRTAC-ın Naxçıvan bürosuna bildirilib ki, bu məsələ ilə bağlı komissiya yaradılıb. Komissiya üzvləri adıçəkilən təhsil müəssisəsində araşdırma aparıb və məlum olub ki, həmin şagird məktəbdə nizam-intizam qaydalarını pozmuşdur. Aidiyyəti üzrə məktəb direktorunun, direktor müavininin, sinif rəhbərinin və digər aidiyyəti şəxslərin izahatları alınıb, şagirdlə profilaktiki söhbətlər aparılıb və hüquq-mühafizə orqanlarına dərhal məlumat verilib. Hazırda qeyd olunan məsələ ilə bağlı hüquq-mühafizə orqanlarında araşdırma aparılır.
Komissiya tərəfindən məktəb rəhbərliyinə həmin məktəblinin nəzarətdə saxlanılması, mütəmadi olaraq şagirdlə profilaktiki söhbətlərin aparılması ilə bağlı tapşırıq verilib. Komissiya üzvləri şagirdin valideynləri ilə də görüşüb, şagirdin məktəbdəki intizamsızlığı ilə bağlı məsələ onların diqqətinə çatdırılıb.