Şahmat məsələlərinin həlli üzrə 40-cı Azərbaycan çempionatı keçirilib
Bakı, 8 aprel, AZƏRTAC
Şahmat məsələlərinin həlli üzrə 40-cı Azərbaycan çempionatı keçirilib.
Yarışın baş hakimi, beynəlxalq dərəcəli hakim İlham Əliyevin AZƏRTAC-a verdiyi məlumata görə, yubiley çempionatında qələbə uğrunda Bakı, Sumqayıt, Gəncə, Şəki, İsmayıllı, Qəbələ, Şabran, Naftalan və Tərtərdən 32 şahmatçı mübarizə aparıb.
Ölkə birinciliyində dünya və Avropa çempionatlarında olduğu kimi, hər birində üç şahmat məsələsi olmaqla altı bölmə üzrə (ikigedişli - 20 dəqiqə, üçgedişli - 60 dəqiqə, etüdlər - 100 dəqiqə, çoxgedişli - 80 dəqiqə, yardımmat - 50 dəqiqə, əks-mat - 50 dəqiqə) ümumilikdə 18 məsələ təqdim olunub. Düzgün həll edilmiş hər tapşırığa görə 5 xal verilib. Çempionat şahmat həlletməsi üzrə dünya kubokunun mərhələ yarışlarından biri kimi qeydiyyatdan keçib.
Şahmat həlletməsi üzrə dünya və Avropa çempionatlarında gümüş medal qazanmış millimizin bir neçə üzvü (Zaur Məmmədov, Misrəddin İsgəndərov, Rəşad Zeynallı, Bəhruz Rzayev) çempionata qatıla bilməsə də, bu, yarışın gərgin rəqabət şəraitində keçməsinə mane olmayıb. Çempionatda şahmat üzrə beynəlxalq usta Nərmin Məmmədova (Bakı) ilk turlardan liderliyi ələ keçirib. O, ilk dəfə olaraq çempion adını qazanmağa yaxın olsa da, dördüncü turda - çoxgedişli məsələlər bölməsində 3 tapşırığı həll edə bilmədiyi üçün bu şansı əldən verib.
Yekunda İsmayıllı şahmatçısı, dördqat ölkə çempionu, beynəlxalq usta Ramil Cavadov 90 mümkün xaldan 78,50 (306 dəqiqə) xal toplayaraq beşinci dəfə Azərbaycan çempionu adını qazanıb. Gümüş medala 72,5 (310 dəqiqə) xalla 15 qat Azərbaycan çempionu, beynəlxalq usta Araz Alməmmədov (Qəbələ), bürünc medala isə 68 (294 dəq) xalla Nərmin Məmmədova (Bakı) layiq görülüb. Təcrübəli Aqşin Məsimov (Bakı) 62,5 xalla dördüncü, ondan yarım xal geri qalan Amil Abbasov (Gəncə) isə beşinci yeri tutublar.
Qadınların yarışında Bakı şahmatçıları Nərmin Məmmədova birinci, beynəlxalq usta Səbinə İbrahimova ikinci, Ayan Allahverdiyeva üçüncü olublar.
Bölmələrdə çempion adını Araz Alməmmədov (ikigedişli, çoxgedişli), Aqşin Məsimov (üçgedişli), Nərmin Məmmədova (etüdlər və əks-mat) və Amil Abbasov (yardımmat) qazanıblar.
Qaliblər pul mükafatları, medallar, fəxri fərman və şahmat kitabları ilə mükafatlandırılıb. Həlletmə komandamız avqustda Litvanın paytaxtı Vilnüsdə keçiriləcək dünya çempionatında ölkəmizi təmsil edəcək.
Xatırladaq ki, şahmat həlletməsi üzrə milli komandamız 2014-cü ildə İsveçrədə keçirilən dünya çempionatında və 2016-cı ildə Yunanıstanda təşkil olunan Avropa çempionatında gümüş medal qazanıb.
Bölmənin digər xəbərləri
