Şamaxı və Ağsu rayonlarında baş vermiş yanğının daha geniş ərazilərə yayılmasının qarşısı alınmışdır
Ağsu, 17 iyun (AZƏRTAC). İyunun 16-da saat 16:30 radələrində Şamaxı rayonunun Göylər kəndindəki taxıl zəmisində yanğın baş vermişdir. Qərb istiqamətində əsən güclü külək tezliklə yanğını qonşu Bağırlı, Ovculu və Hacıqədirli kəndlərinin, oradan isə Ağsu rayonunun Ləngəbiz, Qəşəd, Bico kəndlərinin ərazisinə keçirmişdir.
AZƏRTAC xəbər verir ki, yanğının qarşısının alınması üçün Fövqəladə Hallar Nazirliyinin Ağsu, Şamaxı, habelə bu rayonlara köməyə gəlmiş Abşeron, Qobustan, İsmayıllı, Qəbələ, Göyçay və Kürdəmir rayonlarının yanğından mühafizə qüvvələri, habelə Şamaxıdan mülki müdafiə qüvvələri cəlb olunmuşlar. Fövqəladə Hallar Nazirliyinin 2 ədəd helikopterı də yanğının daha böyük əraziyə yayılmaması və söndürülməsində fəal rol oynamışdır.
Şiddətli külək şəraitində alovla mübarizə axşam saat 21:55-dək davam etmiş, nəticədə yanğın tam söndürülmüşdür.
Bütün səylərə baxmayaraq Şamaxı rayonunda 70 hektar biçilməmiş, 140 hektar isə biçilmiş sahə yanmışdır. Ağsu rayonu ərazisində isə zərər daha çox olmuşdur. Burada 176 hektar taxıl zəmisi, 394 hektar isə biçilmiş sahə yanmışdır.
Hazırda yanğının baş vermə səbəbləri araşdırılır.
Bölmənin digər xəbərləri
