Şəhərsalma proseslərinin sürətlənməsi daşınmaz əmlak qiymətlərini bahalaşdıra bilər - AÇIQLAMA
Bakı, 19 mart, AZƏRTAC
Bakıda köhnə yaşayış binalarının sökülərək yenilənməsi, eyni zamanda, yeni metro xətlərinin və nəqliyyat layihələrinin həyata keçirilməsi paytaxtın urbanizasiya prosesini sürətləndirir. Bu paralel proseslər uzunmüddətli perspektivdə şəhərin daşınmaz əmlak bazarına, şəhər planlamasına və investorların marağına necə təsir göstərə bilər?
Əmlak məsələləri üzrə ekspert Ramil Osmanlı AZƏRTAC-a açıqlamasında bildirib ki, Bakı şəhərinin 2020–2040-cı illəri əhatə edən Baş planının icrası çərçivəsində mühüm infrastruktur və şəhərsalma layihələri həyata keçirilir.
Onun sözlərinə görə, hökumətin əsas prioritetlərindən biri ictimai nəqliyyat infrastrukturunun beynəlxalq standartlara uyğunlaşdırılması, mikromobilliyin inkişafı, ekoloji şəhər mühitinin formalaşdırılması və əhalinin şəhər infrastrukturundan daha rahat istifadə etməsinin təmin olunmasıdır.
Ekspert qeyd edib ki, bu istiqamətdə regionların sosial-iqtisadi inkişaf proqramları da həyata keçirilir.
“Proqramlar çərçivəsində şəhərin mərkəzində və mərkəzə yaxın bəzi ərazilərdə yaşıllıq zolaqlarının genişləndirilməsi və yeni parkların salınması məsələsi də aktuallaşıb. Bu baxımdan söküntü aparılan ərazilər əsasən iki kateqoriyaya bölünür: yaşıl və qırmızı sahələr. Qırmızı zonalara daxil olan ərazilərdə söküntüdən sonra çoxmənzilli binaların tikilməyəcəyi artıq müəyyən edilib. Bu proses şəhərin tədricən mərkəzdən kənar ərazilərə doğru genişlənməsinə səbəb olacaq. Hökumətin əsas məqsədlərindən biri isə mərkəzlə paytaxtın kənar yaşayış sahələri arasında nəqliyyat əlaqəsini gücləndirmək və əhalinin iş yerlərinə, eləcə də sosial infrastruktura çıxışını asanlaşdırmaqdır”, - deyə ekspert qeyd edib.
Ramil Osmanlı vurğulayıb ki, urbanizasiya bu prosesdə əsas amillərdən biridir: “Dövlət müəyyən proqramlar vasitəsilə kənddən şəhərə axının qarşısını almağa, əksinə şəhərdən regionlara və kəndlərə köçü təşviq etməyə çalışır. Bütün bu layihələr daşınmaz əmlak bazarında qiymət artımına da təsir göstərəcək. Bunun əsas səbəblərindən biri odur ki, köhnə və ucuz yaşayış fondlarının yerində daha müasir və bahalı yaşayış binaları və qeyri-yaşayış obyektləri tikilir. Məsələn, əvvəllər mövcud olan 1-2 mərtəbəli fərdi evlər sökülür və onların yerində yeni layihələr həyata keçirilir.
Bundan əlavə, son illərdə tikinti qaydaları daha sərtləşib. Əvvəlki kimi istənilən ərazidə plansız tikinti aparmaq mümkün deyil. Artıq şəhərsalma və sıxlıq əmsalları tətbiq olunur. Bu isə həm torpağın qiymətinin artmasına, həm də tikinti xərclərinin yüksəlməsinə səbəb olur”.
Ekspertin fikrincə, şəhərsalma proseslərinin sürətlənməsi və yeni infrastruktur layihələrinin həyata keçirilməsi gələcəkdə daşınmaz əmlak qiymətlərinin daha da bahalaşmasına gətirib çıxara bilər.
Bölmənin digər xəbərləri
