Şəhriyar Məmmədyarov FIDE-nin reytinq siyahısında 4 pillə irəliləyib
Bakı, 30 sentyabr, AZƏRTAC
Beynəlxalq Şahmat Federasiyası (FIDE) oktyabrın 1-nə olan reytinq siyahısını açıqlayıb.
AZƏRTAC xəbər verir ki, yeni reytinq siyahısına görə, Şəhriyar Məmmədyarov 4 pillə irəliləyərək 7-ci pillədə (2770) qərarlaşıb. Digər şahmatçımız Teymur Rəcəbov isə (2765) ilk 10-luğu qapayıb.
Şahmatçılarımız Qədir Hüseynov (2665, 73-cü yer) və Nicat Abasov (2664, 75-ci) iki pillə geriləyiblər. Rauf Məmmədov (2654) isə 91-93-cü yerləri bölüşür.
Siyahıda ilk üçlükdə hazırkı dünya çempionu, norveçli Maqnus Karlsen (2863), amerikalı Fabiano Karuana (2828) və çinli Liren Dinq (2791) qərarlaşıblar.
Qadınların reytinq cədvəlinə çinli Hou Yifan (2658) başçılıq edir. Hindistan şahmatçısı Humpi Koneru (2586) ikinci, rusiyalı Aleksandra Qoryaçkina (2582) isə üçüncüdür.
Qadın şahmatçılarımızdan Günay Məmmədzadə 2443 xalla 28-ci yerdədir. İlk yüzlükdə yer alan digər iki şahmatçımız - Gülnar Məmmədova (2382) 73-cü, Xanım Balacayeva (2376) 82-ci pillədə qərarlaşıblar.
Bölmənin digər xəbərləri
