ŞƏKİDƏ REGİONAL GÜBRƏ BAZASI İSTİFADƏYƏ VERİLMİŞDİR
Şəki, 18 dekabr (AZƏRTAC). Şəki rayonunun Çələbixan qəsəbəsində, dəmiryol stansiyası ərazisində “Aqrolizinq” Açıq Səhmdar Cəmiyyətinin yeni regional logistik gübrə bazası fəaliyyətə başlamışdır. Bazaya ümumi tutumu 12 min ton olan 4 anbar və yardımçı otaqlar daxildir.
Şəhər icra hakimiyyətinin aqrar məsələlər şöbəsindən bildirmişlər ki, Şəki regional gübrə bazası Azərbaycan Prezidentinin “Kənd təsərrüfatı məhsulları istehsalçılarının toxum, gübrə və damazlıq heyvanları ilə təmin edilməsinə əlavə dəstək verilməsi barədə” 2008-ci il 21 avqust tarixli Sərəncamına uyğun olaraq respublikanın regionlarında yaradılan növbəti logistik bazadır. Kənd təsərrüfatı məhsulları istehsalını daha da artırmaq, məhsul istehsalçılarının mineral gübrələrlə təminatını yaxşılaşdırmaq məqsədi ilə yaradılan bu bazalar gübrələrin saxlanması və bölgə rayonları üzrə fermerlərə paylanılmasını təmin edəcəkdir.
Hazırda “Aqrolizinq” ASC tərəfindən ayrılmış mineral gübrə daşınaraq bazanın anbarlarına yığılır.
Bölmənin digər xəbərləri
