Səudiyyə Ərəbistanının “Arab News” qəzeti Azərbaycan səfirinin məqaləsini dərc edib
Bakı, 25 dekabr, AZƏRTAC
Azərbaycanın Səudiyyə Ərəbistanındakı səfiri Rasim Rzayevin bu ölkənin ingilisdilli “Arab News” qəzetində Dünya Azərbaycanlılarının Həmrəyliyi Günü ilə bağlı məqaləsi dərc olunub.
Səfirlikdən AZƏRTAC-a bildiriblər ki, R.Rzayev məqalədə Həmrəylik Gününün tarixindən və əhəmiyyətindən, xaricdəki Azərbaycan diaspor təşkilatları arasında əlaqələrin möhkəmləndirilməsi istiqamətində görülən işlərdən, son illər ölkəmizin əldə etdiyi uğurlardan, Ermənistan-Azərbaycan, Dağlıq Qarabağ münaqişəsinin ağır nəticələrindən bəhs edir.
Səfir yazır ki, Səudiyyə Ərəbistanı da daxil olmaqla xarici dövlətlərdəki Azərbaycan diasporu fəaliyyət göstərdiyi ölkələrin iqtisadi inkişafına töhfə verməklə yanaşı, siyasi və mədəni həyatda da fəal iştirak edir.
Dünya Azərbaycanlılarının Həmrəyliyi Günündən bəhs edən diplomat bildirir ki, Vətəndən uzaqda yaşamalarına baxmayaraq, həmvətənlərimiz arasında həmrəyliyin möhkəmlənməsini görmək sevindirici haldır. Səfir Azərbaycan hökumətinin xaricdəki diaspor təşkilatlarını hər zaman diqqət mərkəzində saxladığını vurğulayır.
R.Rzayev qeyd edir ki, vaxtilə öz doğma Vətənində yaşayan azərbaycanlılar müharibələr, inqilablar zamanı xaricə sürgün ediliblər və orada məskunlaşıblar. Lakin tarix də göstərir ki, harada yaşamağımızdan asılı olmayaraq biz Azərbaycandanıq.
Məqalədə bu il Azərbaycanın müstəqilliyinin bərpasının 23-cü ildönümünün qeyd edildiyi diqqətə çatdırılır, ötən dövrdə ölkəmizin əldə etdiyi nailiyyətlər barədə məlumat verilir. Vurğulanır ki, irimiqyaslı layihələrin həyata keçirilməsi Azərbaycanı dinamik inkişaf edən dövlətə çevirib, ölkənin beynəlxalq miqyasda etibarlı tərəfdaş kimi nüfuzu daha da artıb. Beynəlxalq miqyasda Azərbaycana böyük hörmət və etimad var. 2011-ci ildə dünyanın 155 ölkəsinin dəstəyini qazanaraq BMT Təhlükəsizlik Şurasının qeyri-daimi üzvü seçilməsi bunun bariz göstəricisidir. Qeyd edilir ki, Azərbaycan dövləti öz gücünü xalqın yaradıcı potensialından alır.
Səfir Azərbaycanın ən ağrılı problemi olan Ermənistan-Azərbaycan, Dağlıq Qarabağ münaqişəsi barədə də məlumat verir. Ermənistan silahlı qüvvələrinin hərbi təcavüzü nəticəsində Azərbaycanın ərazi bütövlüyünün pozulduğu, bir milyondan artıq azərbaycanlının qaçqın və məcburi köçkünə çevrildiyi diqqətə çatdırılır.
Diplomat əminliklə vurğulayır ki, Azərbaycan tezliklə bu problemi də həll edəcək, onun torpaqlarının işğalına son qoyulacaq, beləliklə, dünyanın gözü qarşısında baş verən bu ədalətsizlik aradan qalxacaq.
Bölmənin digər xəbərləri
