Si Cinpin: Dövlətlərarası münasibətlər qarşılıqlı hörmətə əsaslanmalıdır
Pekin, 19 iyun, AZƏRTAC
Dövlətlərarası münasibətlər həmişə qarşılıqlı hörmət və səmimiyyətə əsaslanmalıdır.
AZƏRTAC xəbər verir ki, bu sözləri Çin Xalq Respublikasının (ÇXR) Sədri Si Cinpin Pekində səfərdə olan ABŞ dövlət katibi Antoni Blinken ilə görüşdə deyib. ÇXR Sədri diqqətə çatdırıb ki, Çin tərəfi iki ölkə arasında münasibətlərlə bağlı mövqeyini açıq formada bəyan edib. Si Cinpin ümidvar olduğunu bildirib ki, ABŞ dövlət katibi Çinə səfəri vasitəsilə ikitərəfli münasibətlərin normallaşmasına töhfə verəcək.
Qeyd edək ki, Antoni Blinken Çinə səfərinin birinci günündə bu ölkənin xarici işlər naziri Çin Qan ilə görüşüb.
Çin Xarici İşlər Nazirliyinin görüşə dair yaydığı məlumatda deyilir ki, nazir Çin Qan Çin-ABŞ münasibətlərinin qurulduğu gündən bəri hazırda ən aşağı səviyyədə olduğunu bildirib. O, Pekin-Vaşinqton münasibətlərinin hazırkı durumunun hər iki ölkənin xalqının fundamental maraqlarına və beynəlxalq ictimaiyyətin gözləntilərinə uyğun olmadığını vurğulayıb. Çin Qan ölkəsinin ABŞ ilə bağlı siyasətinin ardıcıl və sabit olduğunu, bu siyasətin qarşılıqlı hörmət, dinc yanaşı yaşayış və “hamı üçün qələbə” prinsiplərinə əsaslandığını diqqətə çatdırıb. Pekinin Vaşinqton ilə sabit, proqnozlaşdırılan və konstruktiv münasibətlərin qurulmasına sadiq olduğunu bildirən çinli nazir Vaşinqtonun bu istiqamətdə Çinlə işləyəcəyinə ümid etdiyini deyib.
Tayvan məsələsinə toxunan çinli nazir bu məsələnin Çinin əsas maraqlarının mərkəzində dayandığını, Çin-ABŞ münasibətlərində ən əhəmiyyətli problem və açıq risk olduğunu qeyd edib. O, Vaşinqtonu “Vahid Çin” prinsipinə və iki ölkə arasında imzalanmış üç birgə kommünikeyə riayət etməyə, “Tayvanın müstəqilliyi”ni dəstəkləməmək öhdəliyini həqiqətən yerinə yetirməyə çağırıb.
Tərəflər görüşdə ikitərəfli, regional və beynəlxalq məsələləri müzakirə edib, yüksək səviyyəli təmasların, işçi qruplar vasitəsilə məsləhətləşmələrin davam etdirilməsinə dair razılığa gəliblər. Bundan başqa, iki ölkənin insanları arasında təmasların və təhsil sahəsində mübadilələrin təşviqinə dair razılıq əldə olunub, birbaşa uçuşların sayının artırılmasına dair müsbət müzakirələr aparılıb.
Qeyd edək ki, bu, ABŞ dövlət katibinin son beş ildə Çinə ilk səfəridir. Əslində Antoni Blinkenin Çinə səfəri yanvar ayına planlaşdırılmışdı. Amma həmin səfər Çinə məxsus aerostatın ABŞ-ın hava məkanını pozmasından sonra təxirə salınmışdı.
ABŞ dövlət katibi Antoni Blinken Çinə səfər çərçivəsində Kommunist Partiyası (ÇKP) Mərkəzi Komitəsinin xarici işlər komissiyası ofisinin rəhbəri, ÇKP Mərkəzi Komitəsinin Siyasi Bürosunun üzvü Vanq İ ilə də görüşüb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
