Siciliyada uşaq oğurlayan beynəlxalq qruplaşma aşkar edilmişdir
Bakı, 1 noyabr (AZƏRTAC). İtaliya polisi uşaqları oğurlayıb satmaqla məşğul olan beynəlxalq cinayətkar qruplaşma aşkar etmişdir. 1988-ci ildə Seulda keçirilmiş Olimpiadanın bürünc mükafatını almış Ukrayna idmançısı Larisa Moskalenkonun da qoşulduğu cinayətkarlar öz fəaliyyətini Siciliya adasındakı Palermo şəhərində əlaqələndirirdilər.
Qruplaşmaya həmçinin bir nəfər Norveç vətəndaşı və bir isveçli daxil idi. Cinayətkar birliyin iştirakçılarını Tunis, Kipr, Misir və Livanda, Şimali və Şərqi Avropa ölkələrində uşaq oğurluqlarının təşkilində ittiham edirlər. Cinayətkarlar oğurladıqları uşaqların qohumlarından 200 min avroyadək pul tələb edirdilər.
Yaxtaları icarəyə verən şirkət Larisa Moskalenkoya məxsusdur. İstintaqın məlumatına görə, o, uşaqların daşınması üçün cinayətkara qayıq və işçi verirdi. Çox vaxt uşaqlara qarşı zorakılıq tətbiq olunurdu.
Bu iş üzrə təhqiqat cari il mayın sonunda Palermo aeroportu yaxınlığında baxımsız mehmanxanada baş vermiş yanğından sonra başlanmışdır.
Məlum olmuşdur ki, Larisa Moskalenko bu obyektin sahibinin həyat yoldaşıdır. Məhz onun vasitəsilə müstəntiqlər bütün cinayətkar şəbəkəni ifşa edə bilmişlər. Qadın və onun cinayət yoldaşları həbs olunmuşlar.
Bölmənin digər xəbərləri
