Sinoptiklərdən xəbərdarlıq: Paytaxtda havanın temperaturu 5-10 dərəcə enəcək, güclü külək əsəcək
Bakı, 3 fevral, AZƏRTAC
Sinoptiklər ölkə ərazisində hava şəraitinin dəyişəcəyi ilə əlaqədar xəbərdarlıq ediblər.
Ekologiya və Təbii Sərvətlər Nazirliyinin Milli Hidrometeorologiya Xidmətindən AZƏRTAC-a verilən məlumata görə, Bakıda və Abşeron yarımadasında fevralın 5-də havanın arabir yağıntılı olacağı, şimal-qərb küləyinin əsəcəyi, sürətinin arabir 15-20 metr/saniyəyə çatacağı, səhər və gündüz bəzi yerlərdə arabir saniyədə 23-28 metrədək güclənəcəyi gözlənilir. Havanın temperaturu ötən günlərlə müqayisədə 8-10° enəcək.
Fevralın 4-ü axşam qərb rayonlarından başlayaraq fevralın 6-sı səhərədək bəzi rayonlarda hava şəraitinin fasilələrlə yağıntılı olacağı, sulu qar, qar yağacağı proqnozlaşdırılır. Yağıntıların əsasən Böyük Qafqazın Quba-Qusar bölgəsində, Şərqi Zəngəzur, Qarabağ və Daşkəsən-Gədəbəy zonalarında intensiv olacağı ehtimal edilir. Qərb küləyi əsəcək, arabir 15-20 metr/saniyə olacaq, ayrı-ayrı yerlərdə saniyədə 23-28 metrədək güclənəcək.
Havanın temperaturu ötən günlərlə müqayisədə 5-10° enəcək.
Əsasən dağlıq və dağətəyi rayonlarda yolların buz bağlama ehtimalı var.
Bölmənin digər xəbərləri
