Şirvan Milli Parkında baş vermiş yanğın söndürülüb
Bakı, 6 iyun, AZƏRTAC
İyunun 5-də saat 15 radələrində Şirvan Milli Parkının ərazisindəki “Salyan Oil” şirkətinin istifadəsində olan sahədə baş vermiş yanğın Fövqəladə Hallar Nazirliyinin və Ekologiya və Təbii Sərvətlər Nazirliyinin (ETSN) yerli qurumlarının əməkdaşlarının səyləri nəticəsində qısa müddət ərzində söndürülüb.
ETSN-in mətbuat xidmətindən AZƏRTAC-a verilən məlumata görə, yanğın zamanı 2 hektara yaxın sahənin quru ot və kol örtüyü yanıb, milli parkın təbii ehtiyatlarına ciddi ziyan dəyməyib. İlkin ehtimala görə, yanğına səbəb “Salyan Oil” şirkəti tərəfindən təhlükəsizlik qaydalarına ciddi əməl olunmaması nəticəsində neft quyularına gedən yüksək gərginlikli elektrik xəttində yaranan qısa qapanma olub.
Yanğının yaxınlıqda olan istirahət mərkəzinə keçməsinin qarşısının alınmasına dair məlumatla bağlı ETSN bildirir ki, həmin ərazinin yaxınlığında heç bir istirahət mərkəzi mövcud deyil, ən yaxınlıqda olan Kürsəngi kəndi isə yanğın baş vermiş ərazidən 10 kilometr uzaqlıqda yerləşir. Ərazidə yalnız “Salyan Oil” şirkətinə məxsus neft quyuları fəaliyyət göstərir.
Bölmənin digər xəbərləri
