Skarlatina çox nadir hallarda dəridə iz buraxır
Bakı, 19 iyun, AZƏRTAC
Skarlatina uşaqlar arasında geniş yayılan xəstəliklərdəndir. İnfeksiya bədənin hər yerində səpgilərə səbəb olur.
AZƏRTAC xəbər verir ki, həkim-pediatr Nigar Mirzəyeva deyib: “Xəstəlik hava-damcı yolu ilə yayılır, ətrafda infeksiyaya yoluxaraq öskürən, asqıran olanda uşaqlara daha tez ötürülür. Səpgilərin davametmə müddəti 3-5 gün olur. Əsasən 5 yaşından yuxarı olan uşaqlarda müşahidə edilir. Daha çox 5-15 yaş arasında olan uşaqlarda rast gəlinir. Qızdırma, yüksək temperatur, boğaz ağrısı xəstəliyin əsas əlamətləri sırasındadır”.
Xəstəlik bəzən əllərdə, barmaqlarda şişkinliyə də gətirib çıxarır: “Müalicədən sonra skarlatina üçün xas olan əlamət əllərdə və ayaqlarda dərinin soyulmasıdır. Əvvəllər skarlatinaya yoluxanlar arasında ölüm halları çox olurdu, lakin son vaxtlar xəstəliyin antibiotik müalicəsi olduğuna görə 3-5 günə, bəzən bir həftəyə keçib gedir. Xəstəliyin xarakterik əlamətlərindən biri “çiyələk dili” adlandırılan dilin qırmızı, moruğu rəngdə olmasıdır”.
Ağırlaşma baş verəndə isə qızdırma və meningitlə nəticələnə bilir. Skarlatina əsasən dəridə iz buraxmır və ya çox nadir hallarda iz buraxır.
Bölmənin digər xəbərləri
