Sloveniya Azərbaycanla avtomobil sənayesində birgə müəssisə yaratmaq niyyətindədir
Bakı, 17 aprel, AZƏRTAC
Sloveniyanın Adriatik dənizində “Kopr” adlanan limanı vasitəsilə tranzit və nəqliyyat sahəsində əməkdaşlıq əlaqələrini daha da genişləndirmək olar.
AZƏRTAC xəbər verir ki, bunu Azərbaycan-Sloveniya biznes-forumunda çıxışı zamanı Sloveniyanın iqtisadiyyat, turizm və idman nazirinin katibi Mitja Blaganje deyib.
O bildirib ki, Sloveniyanın ümumi daxili məhsulunun 10 faizini avtomobil sənayesi tutur.
"Sloveniya “Mercedes”, BMW kimi iri avtomobil istehsalçıları ilə yaxın əməkdaşlıq edir. Ölkəmizdə avtomobil sənayesinə məxsus böyük zavodlar var. Bu sahədə Azərbaycan ilə birgə müəssisələr yaradıb geniş əməkdaşlıq edə və istehsal prosesinə başlaya bilərik”, - deyən katib bildirib ki, Azərbaycanın iqtisadi inkişafı daha böyük istehsal və emal müəssisələrinin qurulmasına imkan verir.
İkitərəfli turizm əlaqələrinə toxunan və Azərbaycanın da böyük turizm potensialının mövcud olduğunu nəzərə çatdıran M.Blaganje hər il Sloveniyanı təxminən 6,6 milyon turist ziyarət etdiyini vurğulayıb: "Biz Azərbaycandan gələn turistlər üçün güzəştli imkanlar yarada bilərik. Turist mübadiləsi tərəflərin turizm sənayesinin inkişafına dəstək verə və bu sahədə fəaliyyət göstərən şirkətlərin gəlirlərini artıra bilər. Sloveniya vətəndaşları son illər Azərbaycan barəsində geniş məlumat alıb və bu gözəl ölkəyə səfər etmək istəyindədir".
Bölmənin digər xəbərləri
