Son 17 il ərzində Azərbaycan qarşısına qoyduğu bütün hədəflərə çatıb
Bakı, 11 mart, AZƏRTAC
Yeni Azərbaycan Partiyasının VII qurultayı ölkəmizin ictimai-siyasi həyatında çox mühüm hadisə olmaqla ictimai-siyasi münasibətlərdə keyfiyyət dəyişiklikləri yaradacaq yeni tarixi mərhələnin əsasını qoydu. Prezident, Yeni Azərbaycan Partiyasının sədri İlham Əliyevin qurultaydakı geniş nitqi çox zəngin və keçilmiş yola verilən qiymətlə, dərin təhlillə səciyyəvi oldu. Prezident yüksək intellektual səviyyəsi ilə seçilən proqram xarakterli çıxışı zamanı ölkəmizin son illərdə keçdiyi tarixi yola bir daha nəzər saldı. Bildirdi ki, Azərbaycan bu gün bölgənin və regionun ən qüdrətli ölkələrindən birinə çevrilib. Bu, xalqımızın və Yeni Azərbaycan Partiyasının fəal işinin nəticəsidir.
Bunu AZƏRTAC-a açıqlamasında deputat Tamam Cəfərova deyib.
T.Cəfərova bildirib ki, ötən müddət ərzində zəngin və şərəfli inkişaf yolu keçən Yeni Azərbaycan Partiyasının VII qurultayının keçirilməsi bir sıra zəruri amillərlə əlaqədardır. Hər şeydən əvvəl qeyd etmək lazımdır ki, YAP-ın qurucusu, böyük dövlət xadimi Heydər Əliyevin bu partiyanı yaradarkən qarşıya qoyduğu məqsəd və vəzifələr, demək olar ki, bütünlüklə artıq yerinə yetirilib. Bunlar ölkəmizdə ictimai-siyasi sabitliyin bərpası, dövlətçiliyimizin möhkəmləndirilməsi, beynəlxalq münasibətlər sistemində milli maraqlarımızı müdafiə edə bilən xarici siyasət strategiyasının formalaşdırılması, rəqabətqabiliyyətli iqtisadiyyatın yaradılması, müstəqil siyasətin həyata keçirilməsi və ən əsası, ərazi bütövlüyümüzün bərpası ilə bağlı olan prinsiplər idi.
Deputat, həmçinin qeyd edib: “Azərbaycan Prezidenti, Yeni Azərbaycan Partiyasının sədri İlham Əliyev 44 günlük Vətən müharibəsində qazandığı tarixi Zəfərlə Azərbaycan xalqının, eyni zamanda, Yeni Azərbaycan Partiyasının ən mürəkkəb və ən çətin, ancaq həm də ən ali məqsədini reallaşdırmış oldu. Azərbaycan möhtəşəm Qələbə qazanaraq həm tarixi ədalətin, həm də ərazi bütövlüyünün bərpasına nail oldu. Beləliklə, istər xalqımızın, istərsə də Yeni Azərbaycan Partiyasının həyatında tarixi bir mərhələ geridə qaldı. Qazandığımız tarixi Qələbə hazırda yeni reallıq yaradıb və Yeni Azərbaycan Partiyası da bu reallıqdan çıxış edərək, özünün yeni fəaliyyət proqramını müəyyənləşdirərək yoluna davam edir. Dövlətimizin başçısı partiyanın qurultayında qeyd etdiyi kimi, Azərbaycan son 17 il ərzində qarşıya qoyulan hədəflərə çatıb. Ötən müddət ərzində Azərbaycan beynəlxalq aləmdə çox böyük nüfuz və hörmət qazanmaqla, həm də öz ərazi bütövlüyünü təmin etdi. Ölkəmiz öz ərazi bütövlüyünü təmin etməklə yanaşı, bölgədə yeni reallıqlar yaratdı”.
Tamam Cəfərova qeyd edib ki, son 17 il ərzində əldə edilən uğurlardan danışan Prezident İlham Əliyev Qarabağ probleminin həlli ilə bağlı məsələyə xüsusi toxunub. O, bununla bağlı deyib: “Mən son 17 il ərzində Qarabağ probleminin həlli ilə bağlı məsələdə Azərbaycan xalqının işğalla heç vaxt barışmayacağını demişəm və bununla əlaqədar olaraq qarşımıza məqsəd qoymuşduq ki, bu işğalın nəticələrini aradan qaldırmaq üçün təxirəsalınmaz tədbirlər görək”. Cənab Prezident çox açıq şəkildə bildirir ki, bu dövrdə çox ciddi basqılar və təzyiqlər var idi. Bizi yarımçıq, qeyri-ədalətli və Azərbaycan xalqını qane etməyəcək sülh şərtləri ilə razılaşmağa vadar edirdilər. Amma biz bu yolu seçmədik. Səbirlə, əzmlə başqa bir yolu - ordunun yenidən qurulmasını, güclü ordu yaradılmasını və münasib vaxt yetişdikdə torpaqları öz gücümüzlə azad etməyi məqsəd seçdik”.
Deputatın sözlərinə görə, 30 ildən artıq əsarətdə qalan torpaqlarımızın işğaldan azad olunması Prezident İlham Əliyevin qətiyyətli, uzaqgörən, müdrik siyasətinin nəticəsidir. Biz 44 günlük Vətən müharibəsində ona görə qələbə qazandıq ki, son 17 il ərzində qarşıya qoyulan hədəflərə çata bildik. Azərbaycan güclü iqtisadi potensialı və möhkəm ordu quruculuğu sayəsində öz ərazi bütövlüyünü bərpa edərək, tarixi ədaləti bərpa etdi. Prezident İlham Əliyevin sözləri ilə desək, bizim şanlı Qələbəmiz qürur mənbəyimizdir!
Bölmənin digər xəbərləri
