Bakı, 23 oktyabr, AZƏRTAC

Azərbaycanda turizmin maddi-texniki bazasının yaradılması Ümummilli Lider Heydər Əliyevin adı ilə bağlıdır. Ulu Öndər respublikaya rəhbərlik etdiyi hər iki dövrdə ölkə turizminin formalaşması üçün mühüm qərarlar verib. Ulu Öndərin siyasi kursunu davam etdirən Prezident İlham Əliyevin rəhbərliyi ilə bütün sahələrdə olduğu kimi, turizmin inkişafında da uğurlar əldə edilib. Xatırladaq ki, hələ “Azərbaycan Respublikası regionlarının sosial-iqtisadi inkişafı Dövlət Proqramının (2004-2008-ci illər)” tədbirlər planında turizmin inkişafına yönəlmiş 30-dan çox məsələ nəzərdə tutulmuşdu.

Bunu AZƏRTAC-a açıqlamasında Azərbaycan Turizm və Menecment Universitetinin dekanı dosent Bahadur Bilalov söyləyib. O bildirib ki, ölkənin turizm sənayesini yüksəkixtisaslı kadrlarla təmin etmək üçün Azərbaycan Turizm və Menecment Universitetinin, Mingəçevir Turizm Kollecinin, Qəbələ Turizm və Hotelçilik Mərkəzinin, İsmayıllıda Turizm üzrə Peşə məktəbinin yaradılması Prezident İlham Əliyevin təşəbbüsü və qayğısı ilə mümkün olub. Görülən məqsədyönlü tədbirlər nəticəsində ölkədə qeyri-neft sektorunun - xüsusən də turizmin inkişafı sürətlənib, regionlarda, ucqar dağ kəndlərində yeni iş yerləri yaradılıb.

Ölkə Prezidentinin 2008-ci il 20 iyun tarixli Fərmanı ilə təsdiq edilmiş “Turizm və rekreasiya zonaları haqqında nümunəvi Əsasnamə” istehlakçıların təhlükəsizliyinin təmin edilməsi, turizm, istirahət və rekreasiya üçün münbit şəraitin yaradılması, turizmin köməyilə tarix və mədəniyyət abidələrinin, nadir təbiət mənzərələrinin, spesifik turist xidməti obyektlərinin, milli-mədəni irsin qorunmasının və təbliğinin təmin edilməsini və bir sıra digər məsələlərin həllini nəzərdə tuturdu. Həyata keçirilən işlərin nəticəsi olaraq ölkəyə gələn xarici turistlərin sayında artım dinamikası baş verib.

İqtisadiyyatın bu sahəsinə ölkə rəhbərliyinin diqqəti, Azərbaycanda keçirilən beynəlxalq turizm sərgilərinə Prezident İlham Əliyevin şəxsən gəlməsi, 2010-2014-cü illərdə Azərbaycanda turizmin inkişafına dair Dövlət Proqramının təsdiq edilməsi bu sahəyə diqqətin bariz nümunəsidir.

B.Bilalov, həmçinin 2011-ci ilin Azərbaycanda “Turizm İli” elan olunduğunu xatırladıb. O qeyd edib ki, Azərbaycan turizmi üçün ən böyük layihə Qusar rayonunda, Şahdağın ətəyində inşa edilmiş yay-qış turizm kompleksi hesab edilə bilər. Bu kompleksin layihələndirilməsi və inşasında Avstriya, İsveç, ABŞ, Türkiyə, İtaliya və Birləşmiş Ərəb Əmirliyinin ən məşhur şirkətləri iştirak ediblər. Ölkəmizdə qeyri-neft sektoruna mühüm töhfə olan “Şahdağ” Turizm Kompleksi Azərbaycan tarixində ilk dağ-xizək kurortudur. Bu möhtəşəm obyektin inşasını daim diqqət mərkəzində saxlayan ölkə rəhbəri dəfələrlə əraziyə gələrək tikintinin gedişi ilə tanış olmuşdu. Digər mühüm layihə isə Qəbələdəki “Tufan” Dağ-Xizək Yay-Qış İstirahət Kompleksidir. İstər “Şahdağ” Qış-Yay Turizm, istərsə də “Tufan” Dağ-Xizək Qış-Yay İstirahət kompleksləri Azərbaycan dövlətinin turizmin inkişafı sahəsində əldə etdiyi uğurların miqyasını göstərir.

Ölkəmizdə turizmin inkişafı üçün əlverişli mühitin yaradılmasının məntiqi nəticəsi olaraq, Azərbaycanın dilbər guşələrindən biri sayılan Şabran rayonunda “Qalaaltı Hotel & SPA” müasir müalicə-istirahət kompleksinin inşası regionun turizm imkanlarının artırılması baxımından mühüm əhəmiyyət daşıyır. Ölkə rəhbərinin müxtəlif illərdə açılışında iştirak etdiyi “Chinar Hotel & SPA Naftalan”, “Rixos Quba Azerbaijan” və digər hotel komplekslərinin istifadəyə verilməsi Azərbaycanda yeni səhiyyə ocaqlarının, sanatoriyaların, mehmanxanaların inşasının, kurort zonalarının inkişaf etdirilməsinin dövlət siyasətinin prioritet istiqamətlərindən biri olduğunun göstəricisidir. Uğurlu turizm siyasəti nəticəsində ölkəmizdə hotel biznesinin dünya standartları səviyyəsində qurulması, qonaqların və turistlərin qəbulu üçün silsilə tədbirlər reallaşdırılır. Bütün bunlar Azərbaycanın iqtisadi potensialını nümayiş etdirməklə yanaşı, həm də respublikamıza gələn turistlərin sayının artmasına zəmin yaradır. Prezident İlham Əliyevin rəhbərliyi ilə bütün ölkə üzrə turizm marşrutlarının müəyyənləşdirilməsi və bununla bağlı bölgələrdə genişmiqyaslı tədbirlərin həyata keçirilməsi diqqət mərkəzində saxlanılır.

Prezident İlham Əliyevin 2016-cı il 1 sentyabr tarixli “Turizmin inkişafı ilə bağlı əlavə tədbirlər haqqında” Sərəncamının və 2016-cı il 6 dekabr tarixli Fərmanı ilə təsdiq olunan “Azərbaycan Respublikasında ixtisaslaşmış turizm sənayesinin inkişafına dair Strateji Yol Xəritəsi”nin də əhəmiyyəti xüsusi qeyd edilməlidir. Belə ki, Sərəncamla ölkədə turizm işçilərinin peşə bayramı təsis edilib, “Strateji Yol Xəritəsi”ndə isə 2025-ci ilə qədər ölkə turizminin inkişaf istiqamətləri öz əksini tapıb. “Azərbaycanda ixtisaslaşmış turizm sənayesinin inkişafına dair Strateji Yol Xəritəsi”ndə Şamaxı Safari Parkının yaradılacağı da qeyd olunmuşdu. Artıq Şamaxı Safari Parkı hazırdır.

Ölkə Prezidentinin 2018-ci il 20 aprel tarixli “Mədəniyyət və turizm sahəsində dövlət idarəçiliyinin təkmilləşdirilməsi ilə bağlı bəzi tədbirlər haqqında Sərəncam”ına əsasən Dövlət Turizm Agentliyi yaradılıb.

“Bu gün Qarabağda, işğaldan azad olunmuş ərazilərimizdə böyük quruculuq, abadlıq işləri həyata keçirilir, müasir standartlara cavab verən hotellər, müasir turizm obyektləri, müxtəlif komplekslər tikilib istifadəyə verilir. 2023-cü il mayın 10-da Prezident İlham Əliyev, birinci xanım Mehriban Əliyeva və ailə üzvləri Şuşa Otel-Konqres Mərkəzi Kompleksinin açılışında iştirak ediblər. Təməli 2021-ci ildə qoyulan Şuşa Otel-Konqres Mərkəzi Kompleksi şəhərin mərkəzində - Zəfər yolunun üzərində yerləşir. 2022-ci ildə “Şuşa İli”ndə Karvansaray konsepti əsas götürülən layihənin inşasına başlanılıb.

2023-cü il avqustun 25-də isə dövlətimizin başçısı Laçın şəhərinə yaxın ərazidə inşa ediləcək mehmanxana kompleksinin təməlqoyma mərasimində iştirak edib. Yüksək xidmətlərin göstəriləcəyi mehmanxana kompleksi müasir standartlar səviyyəsində inşa olunacaq. Prezident İlham Əliyevin 2023-cü il 4 sentyabr tarixli Sərəncamı ilə Azərbaycan Respublikasının “Xınalıq” Dövlət Tarix-Memarlıq və Etnoqrafiya Qoruğunun ərazisi və Qusar, Quba, Şamaxı, Qobustan, Abşeron və Hacıqabul rayonlarından keçən tarixi köç yolunun ərazisi “Xınalıq və Köç yolu” Dövlət Tarix-Mədəniyyət və Etnoqrafiya Qoruğu elan edilib.

Bütün bunlar sübut edir ki, ölkə iqtisadiyyatının ən gəlirli sahələrindən olan turizmin inkişafı Prezident İlham Əliyevin daim diqqət mərkəzindədir və bu sahədə böyük uğurlar əldə edilib. Turizmin inkişafı üçün lazım olan bütün infrastruktur yaradılıb. Dövlətimizin başçısının səyləri nəticəsində Azərbaycan dünyanın cəlbedici turizm ölkələrindən birinə çevrilib. Ölkəmizdə turizm sahəsinin inkişafı üçün qanunvericilik bazasının təkmilləşdirilməsi məqsədilə “Turizm haqqında” yeni Qanun qəbul edilib və dövlətimizin başçısının 2022-ci il 18 fevral tarixli Fərmanı ilə qüvvəyə minib”,- deyə B.Bilalov fikrini yekunlaşdırıb.