“SOYQIRIM: YENI SƏHIFƏLƏR” FİLMİNİN ÇƏKİLİŞLƏRİ BAŞA ÇATIR
AZƏRTAC xəbər verir ki, “Azərbaycantelefilm” Yaradıcılq Birliyində məkrli erməni siyasətindən bəhs edən “Soyqırım: yeni səhifələr” sənədli filminin çəkilişləri başa çatmaq üzrədir.
Film tarixi faktlar, eləcə də bir vaxtlar gizli saxlanılan, lakin Azərbaycan müstəqillik əldə etdikdən sonra üzə çıxarılan arxiv sənədlərinin əsasında ekranlaşdırılmışdır. Ekran əsəri 1918-ci ilin aprel-mayında Qubada ermənilərin türk-müsəlman xalqlarına, həmçinin yəhudilərə qarşı törətdikləri qətliamlardan bəhs edir. Hər il martın 31-də Quba cümə məscidində və yəhudilərin ibadət yeri olan sinaqoqda qətlə yetirilən günahsız insanların ruhuna dualar oxunması və digər anım mərasimləri də filmdə öz əksini tapmışdır.
Çəkilişləri Quba rayonunda aparılan filmdə siyasi xadimlər, yəhudi icmasının nümayəndələri ilə yanaşı, Quba rayon Amsar kənd sakini 103 yaşlı Şirinbikə Nəcəfova o günlərin canlı şahidi kimi gördüklərini nəql edir.
Filmin ssenari müəllifi Yaqub Əlioğlu, quruluşçu rejissoru Miri Rzayev, quruluşçu operatoru Adil Abbasovdur.
Bölmənin digər xəbərləri
