Stiv Uitkof: Ölkələr Qəzzada Sülh Şurasının yaxın müddətdə fəaliyyətə başlamasını dəstəkləyiblər
Vaşinqton, 21 dekabr, AZƏRTAC
Amerika Birləşmiş Ştatları, Misir, Qətər və Türkiyə nümayəndələri Mayamidə Qəzzada atəşkəsin birinci mərhələsini nəzərdən keçirmək və ikinci mərhələyə hazırlıqları irəli aparmaq üçün görüşüblər. AZƏRTAC-ın məlumatına görə, bu barədə ABŞ Prezidentinin xüsusi elçisi Stiv Uitkofun yaydığı bəyanatda deyilir.
Qeyd olunub ki, birinci mərhələdə humanitar yardımın genişləndirilməsi, girovların qaytarılması, qüvvələrin qismən geri çəkilməsi və hərbi əməliyyatların azaldılması da daxil olmaqla irəliləyişlər əldə edilib.
İkinci mərhələ ilə bağlı Qəzzanın bərpası, regional sabitlik, ticarətin asanlaşdırılması, infrastrukturun inkişafı və ortaq resurslar üzrə əməkdaşlıq da daxil olmaqla regional inteqrasiya tədbirləri müzakirə olunub.
Tərəflər Sülh Şurasının yaxın müddətdə yaradılmasını və fəaliyyətə başlamasını dəstəklədiklərini bildiriblər. Müzakirədə Qəzza üçün Hərtərəfli Sülh Planının mərhələli şəkildə həyata keçirilməsində növbəti addımlar nəzərdən keçirilib.
Ölkələr 20 maddəlik sülh planının bütövlüyünə tam sadiq olduqlarını təsdiqləyib. İkinci mərhələnin həyata keçirilməsini irəli aparmaq üçün növbəti həftələrdə əlavə məsləhətləşmələr davam etdiriləcək.
Məlahət Nəcəfova
AZƏRTAC-ın xüsusi müxbiri
Vaşinqton
Bölmənin digər xəbərləri
