Stokholmda narkotik maddələr satılan açıq məkanların sayı azalıb
Stokholm, 22 fevral, Nərgiz Cəfərli, AZƏRTAC
İsveçin Stokholm bölgəsində narkotik vasitələrin alverinin tamamilə açıq şəkildə baş verdiyi yerlərin sayı il ərzində 63-dən 53-ə düşüb.
AZƏRTAC xəbər verir ki, bu, polisin əyalət rəhbərliyi, bələdiyyələr, penitensiar xidmət və İsveç Gömrük Xidməti ilə əməkdaşlığı sayəsində mümkün olub.
“Biz həmin 63 məkanı müəyyən etdik və narkotik vasitələrin ələ keçirilməsi üçün digər səlahiyyətli orqanlarla iki il müddətində fəal işlədik. Həmçinin narkotik maddələrin satışı ilə silah zorakılığı arasında güclü əlaqəni müəyyən etdik”, -deyə Stokholm regional polisinin rəis müavini vəzifəsini icra edən Erik Vidstrand deyib.
Eyni zamanda, polis narkotik vasitələrin ümumi istehlakında azalma müşahidə etməyib. Erik Vidstranda görə, hüquq-mühafizə orqanlarının səyləri onlayn satışların artmasına səbəb ola bilər.
Narkotik vasitələrin açıq dövriyyəsini aradan qaldırmaq üçün ərazidə polis və ya mühafizəçilər yerləşdirilib, eləcə də həmin məkanların ictimaiyyətin diqqətini cəlb edəcək şəkildə təchiz edilməsi üzrə tədbirlər görülüb.
"Biz açıq narkotik maddə alverini sıfıra endirənə qədər mübarizəni davam etdirəcəyik", -deyə polis rəsmisi bildirib.
Bölmənin digər xəbərləri
