STRADİVARİNİN SKRİPKASI REKORD QİYMƏTƏ SATILMIŞDIR

18.05.2006 [21:41]
Çap et
A⁺ A^-

AZƏRTAC-ın İTAR-TASS agentliyindən aldıgı xəbərə görə, Antonio Stradivarinin skripkası Nyu-Yorkda “Kristis” hərracında rekord qiymətə -3,544 milyon dollara satılmışdır. Bu, onu dünyanın ən bahalı musiqi alətinə çevirmişdir. XIX əsrdə İsveç kolleksiyaçısı Kristian Hammerə məxsus olduğu üçün “Hammer” adı ilə tanınan skripkanı Stradivari 1707-ci ildə yaratmışdır. Böyük italyan ustasının yaradıcılığının “qızıl dövrünə” aid olan skripka XX əsrdə ABŞ-ın ərazisini tərk etməmişdir. Onun keçmiş sahibi adının çəkilməməsini istəmişdir.

Lotun başlanğıc qiyməti 700 min dollar idi. “Kristis” ekspertlərinin fikrincə, onun satış qiyməti 1,5-2,5 millyon dollar arasında nəzərdə tutulmuşdu, lakin hərrac zamanı qiymət dərhal qalxmışdı. Ən axırda skripka uğrunda telefonla iki anonim alıcı mübarizə aparmışdır.

Stradivari həyatı boyu mindən çox skripka, alt və violonçel yaratmışdır, lakin dövrümüzə onun cəmi 650 aləti gəlib çıxmışdır.