REGİONLAR
SÜD VƏ SÜD MƏHSULLARI İSTEHSALI İLDƏN-İLƏ ARTIR
Bakı, 2 yanvar (AZƏRTAC). Kənd təsərrüfatı naziri İsmət Abasov bildirmişdir ki, 2015-ci ildə ölkədə süd və süd məhsulları istehsalının 2 milyon 400 min tona çatdırılması nəzərdə tutulur.
“2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı”na uyğun olaraq respublikada heyvandarlıq məhsullarının istehsalı və emalı ildən-ilə artır.
Nazir demişdir ki, Almaniyadan gətirilən damazlıq heyvanların baş sayı xeyli çoxalmışdır. Onların hər birindən gündə orta hesabla 25-37 kiloqram süd sağılır. Süni yolla alınan inəklər ildə orta hesabla Göygöl rayonunun “Səmədoğlu-Atatür” şirkətində 3 min 500 kiloqram, İsmayıllı rayonundakı N.Nikitin adına kolxozda isə 4 min kiloqram süd verir. Hazırda Azərbaycanda 80-ə yaxın süd emalı müəssisəsi fəaliyyət göstərir. Respublikada istehsal olunan süd məhsulları Azərbaycan markası adı altında Gürcüstanda və Rusiyanın paytaxtı Moskvada satılır.
Məlumat üçün bildirək ki, 2008-ci ildə ölkəmizdə 1 milyon 381,6 min ton süd istehsal edilmiş, adambaşına süd məhsulları istehlakı 178,3 kiloqram olmuşdur. Yenicə yola saldığımız 2009-cu ilin on bir ayında isə 1 milyon 307,7 min ton süd istehsal olunmuşdur ki, bu da 2008-ci ilin müvafiq dövrünün göstəricisindən 3,1 faiz çoxdur.