Sudan enerji sahəsində Azərbaycanın təcrübəsindən faydalanmaq niyyətindədir
Bakı, 1 noyabr (AZƏRTAC). Noyabrın 1-də Azərbaycan Respublikasının Dövlət Neft Şirkətində (ARDNŞ) Üçüncü Bakı Beynəlxalq Humanitar Forumunda iştirak edən Sudan Respublikasının bir neçə nazirindən ibarət nümayəndə heyəti ilə görüş keçirilmişdir.
ARDNŞ-in mətbuat xidmətindən AZƏRTAC-a bildirmişlər ki, qonaqları salamlayan şirkətin prezidenti Rövnəq Abdullayev Üçüncü Bakı Beynəlxalq Humanitar Forumunun əhəmiyyətindən danışmış, Azərbaycanın beynəlxalq aləmdə daha yaxından tanınması üçün belə tədbirlərin mühüm əhəmiyyət kəsb etdiyini diqqətə çatdırmışdır.
Sudanın elm, texnologiya və telekommunikasiya naziri Rza Buşra Mühəmməd görüş üçün təşəkkürünü bildirmiş, bir müsəlman dövləti olaraq Sudanda Azərbaycanın yüksələn templərlə inkişaf etməsinin böyük məmnunluq doğurduğunu söyləmişdir. O bildirmişdir ki, Azərbaycan Sudan üçün sosial-iqtisadi yüksəliş örnəklərindən biridir və Bakıda Sudanın səfirliyinin açılması ölkələrimiz arasında əlaqələrin genişlənməsinə mühüm töhfə verəcəkdir.
Daha sonra nazir Rza Buşra Mühəmməd nümayəndə heyətində təmsil olunan həmkarlarını təqdim etmişdir.
Sudan Respublikasının nazirləri Azərbaycanın təcrübəsindən istifadə etmək niyyətində olduqlarını vurğulamış, ARDNŞ ilə əməkdaşlıq imkanları haqqında fikirlərini bildirmişlər.
ARDNŞ-in prezidenti Azərbaycanda neftçıxarma işinin zəngin tarixə malik olduğunu, neftçilərimizin dünya sənayesinə çoxsaylı töhfələr verdiklərini söyləmiş, son 20 ildə ölkəmizdə həyata keçirilən qlobal və regional əhəmiyyətli enerji layihələri çərçivəsində əldə olunmuş nailiyyətlər, bu uğurların qazanılmasında şirkətin rolu haqqında qonaqları məlumatlandırmışdır. O, ARDNŞ-in ötən müddətdə qazandığı zəngin təcrübəni dost ölkələrlə bölüşməyə hazır olduğunu vurğulamışdır.
Görüşdə tərəfləri maraqlandıran digər məsələlər ətrafında da fikir mübadiləsi aparılmışdır.
Bölmənin digər xəbərləri
