Sumqayıt sakini gölə tullantı atdığına görə cərimələnmişdir
Bakı, 5 iyun (AZƏRTAC). Bakının Yasamal rayonundakı “Qanlı göl”ün ətrafına tullantıların atılması barədə Ekologiya və Təbii Sərvətlər Nazirliyinə (ETSN) daxil olmuş şikayət məktubu yerində araşdırılmışdır.
Nazirliyin mətbuat xidmətindən AZƏRTAC-a bildirmişlər ki, şikayət məktubu paytaxt sakini Kənan Kərimov tərəfindən Azərbaycan Respublikasının Prezidenti Administrasiyasına göndərilmişdir. Məktub aidiyyəti üzrə Ekologiya və Təbii Sərvətlər Nazirliyinə daxil olduqdan dərhal sonra əraziyə baxış keçirilmişdir. Dəfələrlə əlaqə saxlanılsa da, şikayətçi vaxtının azlığı səbəbindən araşdırmada iştirakdan imtina etmişdir.
Reyd zamanı Sumqayıt şəhər sakini Fərman Qədimov tərəfindən 50-CH-871 dövlət nömrə nişanlı ZİL-130 markalı yük avtomobili ilə gölün ətrafına tullantıların atılması faktı aşkar olunmuşdur.
Faktla bağlı protokol tərtib olunmuş, Azərbaycan Respublikasının İnzibati Xətalar Məcəlləsinin 110-cu maddəsinə əsasən F.Qədimov inzibati qaydada 500 manat məbləğində cərimə edilmişdir.
Bölmənin digər xəbərləri
