SUMQAYITDA ƏHALİNİN MƏŞĞULLUQ PROBLEMİNİN HƏLLİ YOLLARI ARAŞDIRILIR
Konfrans iştirakçıları görkəmli dövlət xadimi və siyasi xadim, Azərbaycan xalqının ümummilli lideri, Prezident Heydər Əliyevin nurlu xatirəsini bir dəqiqəlik sükutla andılar.
Sumqayıt İcra Hakimiyyətinin başçısı Vaqif Əliyev konfransı açaraq, iştirakçıları və qonaqları salamladı. O, şəhərin sosial-iqtisadi vəziyyətinin elmi surətdə əsaslandırılmış müfəssəl xarakteristikasını verdi və əmin olduğunu bildirdi ki, “Azərbaycan Respublikası regionlarının sosial-iqtisadi inkişafı Dövlət proqramının (2004-2008-ci illər) təsdiq edilməsi haqqında” Azərbaycan Prezidenti İlham Əliyevin Fərmanı Sumqayıtın da iqtisadi potensialını maksimum işə salmağa kömək göstərəcək, sahibkarlığın daha geniş inkişafı üçün əlverişli zəmin yaradacaqdır.
V.Əliyev bildirdi ki, şəhərdə 370 dövlət müəssisəsi fəaliyyət göstərir və burada 32 min 500 adam işləyir. 900 sahibkarlıq subyektində isə 6 min 500 adam çalışır. Sumqayıtda 3438 fiziki şəxs sahibkarlıq fəaliyyəti ilə məşğuldur ki, bu da şəhərin 7 min 272 sakinini işlə təmin etməyə imkan vermişdir.
Natiq Sumqayıtın iqtisadi potensialının təşəkkülündə və inkişafında ümummilli liderimiz Heydər Əliyevin rolunu xüsusi nəzərə çarpdırdı. Etilen-polietilen zavodunun tikilməsi, buxar-generator qurğusu kimi nəhəng kompleksin işə salınması, habelə “Azəralüminium” və “Azərboru”, “Sumqayıtaşqarlar” səhmdar cəmiyyətlərində aparılmış köklü islahatlar onun müdrik və uzaqgörən iqtisadi siyasətinə əyani sübutdur.
V.Əliyev keçən il ərzində məhsul istehsalının səviyyəsini müsbət qiymətləndirərək bildirdi ki, həmin dövrdə 562,4 milyard manatlıq məhsul buraxılmışdır ki, bu da son illərin göstəricilərindən 57 faiz çoxdur. Bu göstərici qeyri-dövlət sektorunda üç dəfə artmış, ümumi istehsalda onun payı 37,3 faiz olmuşdur.
İcra hakimiyyətinin başçısı ayrı-ayrı müəssisələrin göstəricilərindən də danışdı və bildirdi ki, Sumqayıtın iqtisadi inkişafı əhalinin həyat səviyyəsi ilə bilavasitə bağlıdır. Hazırda 195 min əhalisi olan şəhərdə 62 mindən çox məcburi köçkün məskunlaşdırılmışdır. Sakinlərin 145 min nəfəri əhalinin əmək qabiliyyətli hissəsini təşkil edir ki, onların da arasında 40 min yüksək ixtisaslı mütəxəssis var. Lakin onların ancaq 52,5 mini, yəni, 36,2 faizi işlə təmin edilmiş, 29 min adam isə şəhər məşğulluq mərkəzində işsiz kimi rəsmən qeydiyyata alınmışdır.
V.Əliyev ümidvar olduğunu bildirdi ki, belə mötəbər konfrans, o cümlədən ötən il dekabrın axırlarında “Sumqayıt kimyası XXI əsrdə” mövzusunda keçirilmiş elmi-praktik konfrans əlaqədar tərəflərin vəzifələri və onların həlli yollarını müəyyənləşdirməyə, Prezident Fərmanından irəli gələn tələblərin yerinə yetirilməsi taktikasını hazırlamağa, qısa müddətdə yeni iş yerləri açmağa imkan verəcəkdir. O, sumqayıtlıları Prezident Heydər Əliyevin belə bir tapşırığını unutmamağa çağırdı: “Hər bir insan Sumqayıtın inkişafına öz töhfəsini verməlidir”.
Sonra konfransda “İstehsal və xidmət sahəsində problemlər və iqtisadi imkanlar”, “Şəhərin insan potensialının inkişaf etdirilməsi imkanları və sosial vəziyyətinin yaxşılaşdırılması”, “Sahibkarlığın inkişaf etdirilməsi problemləri və iqtisadi inkişafın gedişi”, “Şəhər təsərrüfatının səmərəli idarəçilik sisteminin artırılması problemləri” və digər mövzular müzakirə olundu.
İqtisadi inkişaf naziri Fərhad Əliyev və “Azərikimya” Dövlət Şirkətinin prezidenti Fikrət Sadıqov çıxışlarında Prezidentin məlum Fərmanının əhəmiyyətini vurğulayaraq nəzərə çarpdırdılar ki, Sumqayıtda iqtisadi tərəqqi üçün hər cür şərait və imkanlar, kifayət qədər ixtisaslı kadr potensialı və elmi potensial var. Ayrı-ayrı müəssisələrin problemləri konkret misallar əsasında araşdırıldı.
Konfransda Azərbaycan Prezidenti İlham Əliyevə müraciət qəbul edildi. Müraciətdə deyilir ki, Sumqayıtın 54 illik tarixinin 34 ili Azərbaycan xalqının ümummilli lideri Heydər Əliyevin adı ilə qırılmaz surətdə bağlıdır. Sumqayıtın iqtisadi şöhrəti məhz həmin illərdə yüksəlmiş, iqtisadi potensialı təşəkkül tapmış və inkişaf etmiş, infrastrukturu yaranmış, çoxsaylı sosial-mədəni obyektlər tikilmişdir. Sumqayıtlılar “Azərbaycan Respublikası regionlarının sosial-iqtisadi inkişafı Dövlət proqramının (2004-2008-ci illər) təsdiq edilməsi haqqında” Azərbaycan Prezidenti İlham Əliyevin Fərmanını xüsusi ruh yüksəkliyi ilə qarşılamışlar. Müraciətdə belə bir inam ifadə edilir ki, dövlət başçısının qarşıya qoyduğu vəzifələr layiqincə yerinə yetiriləcəkdir.
Konfransın iştirakçıları və qonaqlar sarayın foyesində açılmış böyük sərgi ilə maraqla tanış oldular. Sərgidə Sumqayıtın 50-dək dövlət və özəl sektor müəssisəsi öz məhsulunu nümayiş etdirir.
Bölmənin digər xəbərləri
