Sumqayıtda “Əlillik mövzusunda məktəb əsaslı maarifləndirmə kampaniyası” adlı silsilə tədbirlərə start verildi
Sumqayıt, 2 noyabr (AZƏRTAC). Sumqayıtda Müasir Təhsil və Tədrisə Yardım Mərkəzinin ümumdünya əlillər gününə həsr olunmuş “Əlillik mövzusunda məktəb əsaslı maarifləndirmə kampaniyası” adlı silsilə tədbirlərə start verilmişdir. Tədbir şəhər 11 saylı məktəbdə keçirilmişdir.
AZƏRTAC xəbər verir ki, öncə məktəbdə inklüziv təhsil alan şagirdlərin müxtəlif mövzularda çəkdiyi rəsmlərin sərgisi nümayiş olunmuşdur. Daha sonra xüsusi qayğıya ehtiyacı olan uşaqlar, onların problemləri, cəmiyyətə inteqrasiyası məsələləri barədə məlumat verilmiş, ölkəmizdə bu istiqamətdə həyata keçirilən layihələrdən, eləcə də Müasir Təhsil və Tədrisə Yardım Mərkəzinin bu istiqamətdəki fəaliyyətindən bəhs edilmişdir.
Bildirilmişdir ki, noyabr ayı ərzində inklüziv təhsil proqramını həyata keçirən Sumqayıtdakı 11 saylı, Bakıdakı 153 saylı orta məktəblərdə keçiriləcək tədbirlərin məqsədi adıçəkilən orta təhsil ocaqları arasında əməkdaşlığın yaradılması, cəmiyyətə inklüziv təhsil, əlillik məsələlərini daha yaxından çatdırmaqdır.
Tədbirdə inklüziv təhsillə bağlı film nümayiş etdirilib, şagirdlər tərəfindən hazırlanmış musiqi parçaları dinlənilmişdir. Tanınmış “Qala” qrupunun ifası tədbirə xüsusi rəng qatmışdır.
Sonda inklüziv təhsil alan 38 şagirdə məktəbin və “Azərikimya” İstehsalat Birliyinin hədiyyələri təqdim olunmuşdur.
Qeyd edək ki, bu layihə Açıq Cəmiyyət İnstitutunun “Uşaqlara yardım üçün Qafqaz Şəbəkəsi” layihəsi tərəfindən dəstəklənir.
Bölmənin digər xəbərləri
