Sumqayıtda sənayenin alternativ enerjidən istifadəyə keçidi və kadr hazırlığı mövzusunda tədbir keçirilib
Sumqayıt, 20 may, Ətrabə Rzayeva, AZƏRTAC
Mayın 20-də Sumqayıtda İqtisadi Zonaların İnkişafı Agentliyi nəzdində fəaliyyət göstərən Peşə Təhsil Mərkəzində ölkəmizin evsahibliyi edəcəyi COP29 çərçivəsində “Sənayenin alternativ enerjidən istifadəyə keçidi: kadr hazırlığı üçün əsas çağırışlar” mövzusunda tədbir keçirilib.
AZƏRTAC xəbər verir ki, tədbirdə Peşə Təhsili üzrə Dövlət Agentliyinin rəhbərliyi, Sumqayıt Kimya Sənaye Parkının rezidentləri, Sumqayıt şəhəri və Abşeron rayonunda fəaliyyət göstərən peşə təhsil müəssisələrinin rəhbərləri və işçiləri, bərpa olunan enerji sahəsində fəaliyyət göstərən yerli şirkətlərin nümayəndələri iştirak ediblər.
Peşə Təhsil Mərkəzinin direktoru Kənan Bağırov tədbir iştirakçılarına Mərkəzin fəaliyyəti ilə bağlı geniş məlumat verib, özəl-dövlət tərəfdaşlığının inkişaf etdirilməsinin, işəgötürənlərin təhsil prosesində aktivliyinin artırılmasının, yeni ixtisaslar üzrə əmək bazarının tələbatına uyğun kadr hazırlığının aparılmasının və alternativ və bərpa olunan enerji istiqamətləri üzrə avadanlıqlara xidmət sahəsində mütəxəssislərin hazırlanmasının prioritet məsələ olduğunu vurğulayıb.
Peşə Təhsili üzrə Dövlət Agentliyinin direktoru Ceyhun Kərəmov Azərbaycanın 2030-cu ilə qədər sosial-iqtisadi inkişafa dair beş milli prioritetindən birinin “Təmiz ətraf mühit və yaşıl artım ölkəsi” olması, ətraf mühitin sağlamlaşdırılması, dayanıqlı enerji mənbələrindən səmərəli istifadənin təmin edilməsi, “Yaşıl dünya naminə həmrəylik ili” çərçivəsində həyata keçirilən tədbirlər, eləcə də peşə təhsilinin mahiyyəti və növbəti ildə bərpa olunan və alternativ enerji istiqamətləri üzrə yeni ixtisasların yaradılması haqqında məlumat verib.
Azərbaycan Elmi-Tədqiqat və Layihə-Axtarış Energetika İnstitutunun şöbə rəisi Valeh Nəsibov “Sənayedə bərpa olunan enerji mənbələrindən istifadə imkanları və enerji səmərəliliyi” mövzusunda və “Helind Enerji” MMC-nin təsisçi Orxan Quluzadə “Azərbaycanda bərpa olunan enerji sistemlərinin tətbiqi” mövzusunda təqdimatlarla çıxış ediblər.
Sonda tədbir iştirakçıları arasında fikir mübadiləsi aparılıb və suallar cavablandırılıb.
Qeyd edək ki, mayın 22-də Sənaye və İnnovasiyalar üzrə Bakı Dövlət Peşə Təhsil Mərkəzində “Eko-nəqliyyata keçid” sərgisi və mayın 24-də Cəlilabad Dövlət Peşə Təhsil Mərkəzində “Kənd təsərrüfatında yaşıl innovasiyalar” mövzusunda infotur keçiriləcək. Mayın 27-də isə milli sosial-iqtisadi prioritet olan təmiz ətraf mühit və “yaşıl artım” üzrə təhsil-təlim komponentlərini müzakirə etmək, bu istiqamətdə yeni sistemli yanaşmaları formalaşdırmaq məqsədilə “Yaşıl artım gündəliyində təhsil” mövzusunda konfrans təşkil ediləcək.
Bölmənin digər xəbərləri
