Sumqayıtda yaşıllaşdırma marafonu çərçivəsində 18 minə qədər ağac əkilib
Sumqayıt, 15 noyabr, Ətrabə Rzayeva, AZƏRTACÜmumrespublika yaşıllaşdırma marafonu çərçivəsində Sumqayıtda ağacəkmə aksiyası keçirilib. Aksiya Heydər Əliyev Fondunun vitse-prezidenti, IDEA (International Dialogue for Environmental Action) - Ətraf Mühitin Mühafizəsi üzrə Beynəlxalq Dialoq təşəbbüsünün təsisçisi Leyla Əliyeva layihəsi əsasında həyata keçirilir.
AZƏRTAC xəbər verir ki, Sumqayıt-Quba avtomagistral yolunun kənarında keçirilən ağacəkmə aksiyasında şəhər rəhbərliyi, idarə və təşkilatlarının, orta və ali təhsil müəssisələrinin, təsərrüfat xidmətlərinin işçiləri iştirak ediblər. Ərazidə təmizləmə işləri də aparılıb, yeni torpaq qatı salınıb. Aksiya çərçivəsində yol kənarlarındakı mövcud yaşıllıqlara da qulluq olunub və nar ağacları əkilib. Aksiya zamanı yeni əkilən ağaclar suvarılıb və onlara aqrotexniki qulluq göstərilib.
Sumqayıtın florasının daha da zənginləşdirilməsi və gözəlləşdirilməsi məqsədi ilə şəhərin Heydər Əliyev və Nəsimi adına mədəniyyət və istirahət parklarında, həmçinin küçələrində bu günə kimi yaşıllaşdırma marafonu çərçivəsində 18 minə qədər yerli ağac növləri ilə yanaşı, eləcə də bir sıra dekorativ gül və ağac kolları əkilib.
Qeyd edək ki, həyata keçirilən 1-ci ümumrespublika yaşıllaşdırma marafonu çərçivəsində Sumqayıtda ümumilikdə 30 mindən çox ağac əkilməsi nəzərdə tutulub.
Bölmənin digər xəbərləri
