Bakı, 25 sentyabr, AZƏRTAC

Oktyabrın 25-də AMEA-nın akademik Ziya Bünyadov adına Şərqşünaslıq İnstitutunda “Şuşa - Türk dünyasının mədəniyyət paytaxtı” mövzusunda elmi sessiya keçirilib.

Bu barədə AZƏRTAC-a institutdan məlumat verilib. Bildirilib ki, tədbirdə çıxış edən AMEA-nın vitse-prezidenti vəzifəsini icra edən, Şərqşünaslıq İnstitutunun baş direktoru akademik Gövhər Baxşəliyeva 2020-ci ildə Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusu tərəfindən azad olunan Şuşanın bütövlükdə Türk dünyası üçün böyük əhəmiyyəti olduğunu deyib.

G.Baxşəliyeva 2022-ci il martın 31-də Bursa şəhərində Beynəlxalq Türk Mədəniyyəti Təşkilatına üzv ölkələrin Mədəniyyət Nazirlərinin Daimi Şurasının növbədənkənar iclasında Şuşa şəhərinin 2023-cü il üçün “Türk dünyasının mədəniyyət paytaxtı” elan edildiyini xatırladıb, Prezident İlham Əliyevin bununla bağlı tədbirlərin həyata keçirilməsi haqqında Sərəncam imzaladığını qeyd edib. Sərəncamın icrasından irəli gələn vəzifələrə əsasən, Şərqşünaslıq İnstitutunda da bir sıra tədbirlərin həyata keçirildiyini söyləyən akademik elmi sessiyanın bu istiqamətdə mühüm addımlardan olduğunu bildirib.

İnstitutun Gənc Alim və Mütəxəssislər Şurasının sədri, Din və ictimai fikir şöbəsinin müdiri fəlsəfə üzrə fəlsəfə doktoru Elnur Mustafayev “Şuşada 1905-ci il soyqırımları (epiqrafik abidələr əsasında)” mövzusunda məruzə edib. Məruzədə 1905-1906-cı illərdə mütəşəkkil erməni silahlı qüvvələrinin Azərbaycanın müxtəlif şəhər və bölgələrində dinc azərbaycanlı müsəlman əhaliyə qarşı törətdiyi kütləvi qırğınlardan söhbət açılıb, bu soyqırımların baş verdiyi şəhərlərdən birinin də Şuşa olduğu qeyd edilib. Elnur Mustafayev bu ilin iyun-iyul aylarında elmi tədqiqat məqsədilə Şuşada olarkən aşkarladığı epiqrafik abidələrdə bu dəhşətli cinayətlərin əks olunduğunu müəyyən edib. Onun aşkarladığı bəzi məzar daşlarında ərəb və fars dillərində ermənilərin azərbaycanlı dinc müsəlman əhalini qətlə yetirdiyi haqda məlumatlar həkk olunub.

İran filologiyası şöbəsinin aparıcı elmi işçisi dosent Səadət Şıxıyeva “Qarabağlı xanzadələrin bədii yaradıcılığında siyası notlar”, filologiya üzrə fəlsəfə doktoru Aybəniz Həsənova “Şuşa ziyalıları” mövzusunda məruzələrlə çıxış ediblər. Məruzələrdə ilk dəfə olaraq Cavanşirlər nəslindən olan şairlərin ikidilli bədii yaradıcılığında çar Rusiyanın işğalından sonrakı Qarabağa münasibətdən bəhs edilib. Qarabağın görkəmli şəxsiyyətləri Həmidə xanım Cavanşir-Məmmədquluzadənin həyatı, xeyirxahlığı haqqında söhbət açılıb, bundan başqa görkəmli alim Xudu Məmmədovun fəaliyyəti, Azərbaycan elminə verdiyi töhfələr haqqında danışılıb, tanınmış dünya alimləri ilə müqayisəsi aparılıb.

Məruzələr ətrafında çıxışlar olub, suallar cavablandırılıb.