Tayfun Kılıç: Naxçıvan yüksək ixrac potensialına malikdir
Naxçıvan, 18 yanvar, Rauf Əliyev, AZƏRTAC
Muxtar respublikadakı bir sıra istehsalat müəssisələrində olduq. Müəssisələrdə ən müasir texnologiyalardan istifadə olunması Naxçıvanın ixrac imkanlarını xeyli artırır. Muxtar respublika güclü infrastruktura və sənaye potensialına malikdir.
Bu sözləri AZƏRTAC-a müsahibəsində Türkiyə Respublikasının İqtisadiyyat Nazirliyinin İxracat Müdirliyinin dairə rəhbəri Tayfun Kılıç deyib.
O qeyd edib ki, Naxçıvanda sənaye müəssisələrinin yaradılması, kənd təsərrüfatının inkişafı muxtar respublikanın Türkiyənin yaxın vilayətlərinə ixracat imkanlarını artırır. Türkiyə hökuməti muxtar respublikadan Qars və İqdır vilayətlərinə 150 milyon ABŞ dolları həcmində sənaye və kənd təsərrüfatı məhsullarının ixrac edilməsinə şərait yaratmaq məqsədilə qeyd olunan ixracat məhsulları üçün nəzərdə tutulan gömrük vergilərini ləğv edib.
Tayfun Kılıç deyib: “Naxçıvan Biznes Mərkəzində naxçıvanlı sahibkarlara da görüşdük. Sahibkarların Türkiyəyə mal ixrac edərkən hansı problemlərlə qarşılaşdıqlarını öyrənməyə çalışdıq. Onların fikirlərini dinlədik, problemlərini öyrəndik, bu məsələlərin həlli yolları barədə fikir mübadiləsi apardıq. Mövcud problemlərin ortadan qaldırılması üçün təklifləri ümumiləşdirərək ən qısa zamanda Türkiyənin Baş nazirinə və iqtisadiyyat nazirinə təqdim edəcəyik. Çünki Azərbaycanın ayrılmaz tərkib hissəsi olan Naxçıvan Muxtar Respublikası Türkiyə üçün xüsusi əhəmiyyətə malik bir bölgədir”.
Türkiyəli iş adamlarından ibarət heyətin muxtar respublikaya səfərinin təşkil edilməsi istiqamətində də işlərin görüləcəyini deyən Tayfun Kılıç bildirib ki, naxçıvanlı sahibkarların da İqdıra və Qarsa səfər etmələri, oradakı iş adamları ilə qarşılıqlı fikir mübadiləsi aparmaları gündəmdədir.
“Ümid edirəm ki, qarşıdakı aylarda Naxçıvan Muxtar Respublikası ilə Türkiyə Respublikasının yaxın vilayətləri arasında ticarət əlaqələri daha da artacaq”, - deyə Türkiyə Respublikasının İqtisadiyyat Nazirliyinin İxracat Müdirliyinin dairə rəhbəri bildirib.
Bölmənin digər xəbərləri
