Tbilisidə Azərbaycanın Müstəqillik Günü qeyd olunub
Tbilisi, 25 may, AZƏRTAC
Tbilisidə 28 May - Azərbaycanın Müstəqillik Gününə həsr olunmuş təntənəli tədbir keçirilib.
AZƏRTAC xəbər verir ki, əvvəlcə Azərbaycanın və Gürcüstanın Dövlət himnləri səsləndirilib.
Tədbirdə Azərbaycanın Gürcüstandakı səfiri Faiq Quliyev, Gürcüstan parlamentinin sədri Şalva Papuaşvili, parlament deputatları, nazirlər, diplomatik korpusun nümayəndələri və ictimaiyyət təmsilçiləri iştirak ediblər.
Sonra Dünya Şəhərsalma Forumunun 13-cü Sessiyasına həsr olunmuş videoçarx nümayiş etdirilib.
Səfir F.Quliyev çıxış edərək bildirib ki, tariximizin müxtəlif dövrlərində ağır sınaqlardan keçsək də, müstəqillik arzusu heç zaman sönmədi. Bu gün qüdrətli və qalib Azərbaycan dövləti həmin arzunun, həmin inamın və mübarizənin bəhrəsidir. “Biz fəxr edirik ki, məhz Azərbaycan xalqı müsəlman aləmində ilk demokratik respublikanın yaradılmasının müəllifi olub. Bu günün xüsusi mənası da ondadır ki, müasir Azərbaycan və Gürcüstan dövlətçiliyinin yolları məhz burada, Tbilisidə kəsişmişdi. Tarix xalqlarımıza eyni dövrdə və eyni məkanda azadlıq imkanı verdi. Bu, sadəcə tarixi təsadüf deyil, xalqlarımızın taleyini birləşdirən böyük bir mirasdır”, – deyə diplomat vurğulayıb.
Səfir mayın 26-da dost, qardaş Gürcüstanın Milli bayramı – Müstəqillik Gününü qeyd edəcəyini bildirib. F.Quliyev deyib: “Mayın 18-də Bakıda Azərbaycan və Gürcüstan hökumətləri arasında imzalanmış sənədə əsasən, mayın 25-dən Bakı-Tbilisi-Bakı marşrutu üzrə sərnişin qatarlarının fəaliyyəti bərpa olunacaq. Dəmir yolların açılışı ilkin mərhələdə yalnız Gürcüstan istiqamətində həyata keçiriləcək. İlk qatar bu axşam 23:10-da Bakıdan yola düşəcək, mayın 26-da səhər saatlarında Gürcüstanın Müstəqillik Günündə Tbilisiyə çatacaq. Şübhəsiz ki, bu hadisə dərin rəmzi məna daşıyır və məhz bu günə təsadüf etməsi Prezident İlham Əliyevin xüsusi qərarı və göstərişi əsasında baş tutur”.
Bildirilib ki, müstəqillik yoluna eyni tarixi dövrdə qədəm qoymuş Azərbaycan və Gürcüstan taleyin oxşar sınaqları ilə üz-üzə qalmış, azadlıqlarını qorumaq və dövlətçiliklərini möhləmləndirmək uğrunda çətin, lakin şərəfli yol keçmişlər. Təəssüf ki, Azərbaycan Xalq Cümhuriyyətinin ömrü cəmi 23 ay sürdü, lakin bu qısa zaman kəsiyi bütöv bir əsrə bərabər tarixi miras yaratdı.
Xalqımızın 1990-cı ilin əvvəlində üzləşdiyi problemlərdən danışan səfir deyib ki, xalqımız öz müdrikliyini nümayiş etdirərək, nicat yolunu məhz Ulu Öndər Heydər Əliyevdə gördü. Onun siyasi hakimiyyətə qayıdışı Azərbaycan dövlətçiliyinin xilası, xalqımızın gələcəyə ümidinin bərpası idi. Bu gün qürur hissi ilə deyə bilərik ki, müasir müstəqil Azərbaycan dövləti Ulu Öndər Heydər Əliyevin siyasi dühasının və sonsuz vətən sevgisinin möhtəşəm təcəssümüdür.
Bu siyasi kurs bu gün Azərbaycan Respublikasının Prezidenti, Müzəffər Ali Baş Komandan İlham Əliyev tərəfindən uğurla davam etdirilir.
Azərbaycan xalqının onilliklər boyu qəlbində yaşatdığı ən böyük arzu - Vətən müharibəsi ilə başlanılan ərazi bütövlüyümüzün bərpası məhz Prezident İlham Əliyevin rəhbərliyi ilə gerçəkləşdi. Xalqımız tarixi ədaləti bərpa etdi, milli qürurunu özünə qaytardı və dünyaya bir daha bəyan etdi ki, heç zaman işğalla barışmayacaq. Bu gün Azərbaycan güclüdür, qalibdir və öz taleyinin sahibidir.
Daha sonra çıxış edən Şalva Papuaşvili Azərbaycan xalqını dövlət bayramı münasibətilə təbrik edərək bunun həm dost və qardaş Azərbaycan, həm də Gürcüstan üçün əlamətdar tarix olduğunu bildirib. O, hər iki xalqın əsrlər boyu dostluq münasibətləri saxladığını və bu əlaqələrin bu gün də uğurla inkişaf etdiyini vurğulayıb.
Çıxışlardan sonra Azərbaycanın Əməkdar artisti Təyyar Bayramovun ansamblı, “Ranina” vokal müsabiqəsində “Şən Azərbaycan” mahnısını ifa edən qrupun üzvləri və rəqs qrupları maraqlı konsert proqramı ilə çıxış ediblər.
Bölmənin digər xəbərləri
