TƏBİİ FƏLAKƏTİN ZİYAN VURDUĞU RAYONLARDA BƏRPA VƏ YENİDƏNQURMA İŞLƏRİ SÜRƏTLƏNDİRİLİR
Saatlı, 5 iyul (AZƏRTAC). Təbii fəlakətdən əziyyət çəkən rayonlarda kompleks işlər görülür.
Dövlətimizin başçısı İlham Əliyevin tapşırıqları yerlərdə uğurla həyata keçirilir. Bölgədə taxıl biçininə başlanmışdır, yenidənqurma və bərpa işləri davam etdirilir.
Təbii fəlakət rayonlarında taxıl biçininə start verilmişdir. Hazırda bölgədə canlanma müşahidə olunur. Bu mövsüm hava şəraitinin əlverişsiz olmasına baxmayaraq, Saatlı rayonunda hər hektardan orta hesabla 30-32 sentner məhsul götürüləcəkdir. İndiyədək 45 min tondan çox taxıl tədarük olunmuşdur. Qeyd edək ki, Kür çayı ilə Sarısu gölü arasında bəndin dağılması nəticəsində Saatlının 2400 hektardan çox taxıl sahəsi su altında qalmışdır.
Sabirabadda da taxıl yığımına başlanılmışdır. Bu il Sabirabadda 20 min hektar sahədə taxıl əkilmişdir. Daşqın nəticəsində rayonun taxıl sahələrinin 7000 hektarını su basmışdır. Mütəxəssislərin qənaətinə görə aprel, may aylarında havaların yağmurlu keçməsi və bunun nəticəsində qrunt sularının qalxması məhsuldarlığı 7-8 faiz aşağı salmışdır. Hazırda rayonda 10.000 hektardan çox taxıl sahəsi biçilmişdir.
Bölmənin digər xəbərləri
