Təhsil naziri MİSİR MƏRDANOV ölkənin ulu öndər Heydər Əliyev tərəfindən müəyyən olunmuş təhsil konsepsiyasının reallaşması istiqamətində görülən nəhəng işlər və qarşıya çıxan problemlər barədə danışdı:

-Möhtərəm cənab Prezident!

Hörmətli iclas iştirakçıları!

İcazə verin, ümummilli liderimiz Heydər Əliyevin Fərmanı ilə təsis olunmuş “1 avqust - Azərbaycan dili və Azərbaycan əlifbası günü” münasibətilə sizi təbrik edim, ölkəmizin inkişafı naminə şərəfli fəaliyyətinizdə hamınıza uğurlar arzulayım.

Cənab Prezident, hesabat dövründə Təhsil Nazirliyi fəaliyyətini ölkə Konstitusiyasına, ümummilli lidermiz Heydər Əliyev tərəfindən təsdiq olunmuş Təhsil İslahatı Proqramına, Sizin fərman və sərəncamlarınıza, hökumətin qərarlarına müvafiq olaraq qurmuş, işini ölkəmizdə təhsilin inkişafını təmin edən dövlət proqramlarının həyata keçirilməsi istiqamətində davam etdirmişdir.

İcazənizlə, cənab Prezident, yeni tədris ili başlananadək həyata keçiriləcək tədbirləri yüksək diqqətinizə təqdim edim. Cari ilin sentyabrın 15-dək 34 min şagird yerlik 57 yeni məktəb binası, 59 məktəbin yanında 16 min şagird yerlik yeni korpuslar, 710 yerlik 7 uşaq bağçası istifadəyə veriləcək, 38 məktəbin əsaslı təmiri başa çatdırılacaqdır. Cənab Prezident, xüsusi vurğulamaq istəyirəm ki, yeni məktəblərin 22-si, əlavə korpusların 21-i, uşaq bağçalarının hamısı, əsaslı təmir olunan məktəblərin 15-i Bakı şəhərində yerləşir. Bu, paytaxtda tədrisin keyfiyyətinə mənfi təsir edən şagird sıxlığı və çoxnövbəlilik probleminin həllinə kömək edəcəkdir.

Cari ilin sonunadək daha 84 yeni məktəb və əlavə korpus, 3 uşaq bağçası istifadəyə veriləcək, qəza vəziyyətində olan daha 13 məktəbin əsaslı təmirinə, 46 yeni məktəbin inşasına başlanacaq, bu müəssisələr 2008-ci ildə təhvil veriləcəkdir. Beləliklə, möhtərəm cənab Prezident, bir il ərzində ölkəmizdə dövlət vəsaiti hesabına 200 yeni məktəbin tikintisi başa çatdırılacaqdır. Son 4 ildə yeni inşa edilən məktəblərin sayı 1200-ü ötəcəkdir. Bütün təhsil ictimaiyyətinin fikrini ifadə edərək xüsusi vurğulamaq istəyirəm ki, Sizin rəhbərliyinizlə əldə edilmiş bu misilsiz nailiyyət Azərbaycan tarixinin ən yaddaqalan səhifələrindən biri olacaqdır.

Yeni tikilmiş və əsaslı təmir olunmuş məktəblərin hamısı müasir avadanlıqla təchiz edilmişdir. Bundan əlavə, müvafiq proqrama əsasən cari ildə 158 məktəbə yüksək keyfiyyətli avadanlıq verilməklə, ümumilikdə belə məktəblərin sayı 325-i keçmişdir. Sizin qayğınız nəticəsində bu ilin payız-qış mövsümünədək Bakı şəhərində 250 məktəbin istilik sisteminin təmiri və bərpası problemi də öz həllini tapacaqdır.

Hörmətli cənab Prezident!

Bu sahədə görülmüş işlərlə yanaşı, problemlərimiz hələ də qalmaqdadır. Ölkənin 4525 məktəbi mütəxəssislər tərəfindən müayinədən keçirilmiş və məlum olmuşdur ki, 600 məktəb üçün yeni binanın inşa edilməsinə, 700-dən çox məktəb üçün əlavə korpusların tikintisinə, 1500 məktəbin əsaslı təmirinə, məktəblərin 70 faizinin istilik sisteminin təmiri və bərpasına, 60 faizdən çoxunun müasir avadanlıqla, o cümlədən laboratoriya və əyani vəsaitlərlə təminatına hələ də ehtiyac vardır.

Sizin tapşırığınıza əsasən, bu problemin həlli üçün 5 illik inkişaf proqramı hazırlanmışdır. Proqrama əsasən, hər il 120 yeni məktəbin tikintisi, 140 məktəb üçün əlavə korpusların inşası, 300 məktəb əsaslı təmir olunacaqdır. Yəni, hər il 500-dən çox təhsil müəssisəsinin əsaslı təmiri və tikintisi aparılmalıdır. İlkin hesablamalara görə, bu işlərin görülməsinə hər ildə 400 milyondan çox vəsait tələb olunacaqdır.

Cənab Prezident, Sizin təsdiq etdiyiniz Proqram çərçivəsində ilin sonuna qədər ölkəmizdə daha 2519 məktəb İKT avadanlığı ilə təchiz olunacaq, 500-dən çox məktəbə noutbuk və proyektorlar veriləcək, 4000 müəllim treninqdən keçiriləcək, ölkənin kompyuterləşmiş məktəbləri 4 fənn - Azərbaycan tarixi, kimya, biologiya, fizika üzrə audiovizual tədris sistemləri və əyani vəsaitlərlə təmin ediləcəkdir. Beləliklə, 3 il ərzində həyata keçirilən proqram çərçivəsində məktəblərin kompyuterləşməsinin birinci mərhələsi başa çatacaq, 5-11-ci siniflərdə 29 şagirdə bir kompyuter nisbəti təmin olunacaqdır. Sizin tapşırığınıza əsasən, ölkənin təhsil sisteminin informasiyalaşdırılması üzrə 2008-2012-ci illəri əhatə edən yeni dövlət proqramının hazırlığı da artıq başa çatdırılmışdır.

Hörmətli cənab Prezident!

Orta məktəblərin dərsliklərlə təmin olunması proqramı da davam etdirilir. 2007/2008-ci tədris ili üçün 156 adda 5 milyon nüsxədən çox dərsliyin nəşri nəzərdə tutulubdur. Dərsliklərin 60 faizdən çoxu artıq çap olunub məktəblərə çatdırılmaqdadır. Eyni zamanda, Gürcüstan və Dağıstanda yaşayan soydaşlarımızın ehtiyacları da nəzərə alınmışdır. İndiyədək məktəblər üçün ciddi problemlərdən biri olan xəritələrin hazırlanması məsələsi öz həllini tapmış, 19 adda xəritə çap edilərək məktəblərə paylanmışdır.

Hörmətli cənab Prezident, böyük məsuliyyətlə yüksək diqqətinizə çatdırmaq istəyirəm ki, məktəblərimizin latın qrafikası ilə çap olunmuş dərsliklər, dərs vəsaitləri, əlavə oxu materialları ilə təminatı sahəsində bu gün heç bir problem qalmamışdır.

2008/2009-cu dərs ilindən yeni dərslik siyasətinə, dərsliklərin yeni qiymətləndirilməsi mexanizminə keçiləcəkdir. Yeni siyasətə əsasən, hər bir fənn üzrə dərslikdən əlavə, daha iki vəsaitin - müəllimlər üçün vəsaitin və şagirdlər üçün iş dəftərinin hazırlanması nəzərdə tutulmuşdur. 2005-2009-cü illəri əhatə edən məktəblərin pedaqoji kadrlarla təminatı proqramına əsasən, bu il güzəştli şərtlərlə 1300-dən çox müəllim ucqar kənd məktəblərinə, ciddi ehtiyac olan yerlərə göndəriləcəkdir.

Cənab Prezident, təhsilin digər probleminə diqqətinizi cəlb etmək istəyirəm. Son illər Sizin diqqətiniz nəticəsində təhsil sektoruna ayrılan maliyyə vəsaitinin bir neçə dəfə artırılmasına baxmayaraq, etiraf edirəm ki, hələ də keyfiyyət baxımından istədiyimiz nəticəni əldə edə bilməmişik. Əlbəttə, səbəblər çoxdur, ancaq bizim fikrimizcə, başlıca səbəb valideynlərin, müəllimlərin, təhsil alanların və bütövlükdə ictimaiyyətin bu vacib məsələyə yanaşmasının düzgün olmamasıdır.

Möhtərəm cənab Prezident!

Fürsətdən istifadə edərək, son 6 ay ərzində təhsilin üç prioritet istiqaməti - Azərbaycan gənclərinin xaricdə təhsili, məktəbəqədər təhsil və texniki peşə təhsili üzrə dövlət proqramlarını təsdiq etdiyinizə görə ölkənin təhsil ictimaiyyəti adından Sizə dərin minnətdarlığımı bildirirəm. Hazırda hər üç proqram üzrə işlər müvafiq dövlət və qeyri-dövlət qurumları ilə əlaqəli şəkildə davam etdirilir.