TƏLƏBƏ QƏBULU ÜZRƏ DÖVLƏT KOMİSSİYASINDA BRİFİNQ KEÇİRİLMİŞDİR

23.11.2005 [18:40]
Çap et
A⁺ A^-

AZƏRTAC xəbər verir ki, noyabrın 23-də Tələbə Qəbulu üzrə Dövlət Komissiyasında kütləvi informasiya vasitələrinin nümayəndələri üçün brifinq keçirilmişdir.

Komissiyanın sədri Məleykə Abbaszadə “Abituriyent” jurnalının 11-ci nömrəsinin çapdan çıxdığını və həmin nəşrdə bu il ali məktəblərə yüksək nəticələrlə qəbul olunmuş abituriyentlər haqqında məlumatlar verildiyini bildirmişdir.

Qeyd olunmuşdur ki, 2005�6-cı tədris ili üçün ali təhsil müəssisələrinə keçirilmiş qəbul imtahanlarında 100 mindən çox abituriyent iştirak etmiş, onlardan 1045 nəfəri (1 faiz) 600-dən çox bal toplamışdır. Yüksək nəticələr qazanan gənclərdən 221-i Bakı Dövlət Universitetinə, 80-i Azərbaycan Respublikasının Prezidenti yanında Dövlət İdarəçilik Akademiyasına, 99-u Dövlət Neft Akademiyasına, 106-sı Azərbaycan Tibb Universitetinə, 440-ı Dövlət İqtisad Universitetinə qəbul olunmuşdur. Onlar 70-dən artıq rayonun orta məktəblərinin məzunlarıdırlar.

M.Abbaszadə diqqətə çatdırmışdır ki, ali məktəblərə ən yüksək balla daxil olmuş 100 nəfər Prezident təqaüdünə layiq görülmüşdür.

Brinfinqdə TQDK-da son aylar görülmüş işlər barədə də məlumat verilmişdir.

Sonra komissiyanın sədri jurnalistləri maraqlandıran sualları cavablandırmışdır.