Tələbələrin və təhsil müəssisələrinin nəzərinə
Bakı, 2 noyabr, AZƏRTAC
Noyabrın 11-dən Təhsil Nazirliyi tərəfindən https://e-telebe.edu.az elektron portalı vasitəsilə müraciətlərin qəbulu prosesi dayandırılacaq.
Təhsil Nazirliyindən AZƏRTAC-a bildirilib ki, müraciətlər üçün son tarix noyabrın 10-dur. Tələbələr qeyd edilən tarixədək https://e-telebe.edu.az elektron portalına müraciətlərini yekunlaşdırmalı, natamam müraciətləri tamamlayaraq təsdiq etməlidir.
Təhsil müəssisələri tələbələrin bu barədə təkrar məlumatlandırılmasını təmin etməli, müraciətlərə müəyyən edilmiş qaydada baxmalı, hüququ yaranan tələbələr üzrə müraciətləri təsdiq etməlidir.
Xatırladaq ki, Təhsil Nazirliyi sentyabrın 30-dan https://e-telebe.edu.az elektron portalı vasitəsilə bu tədris ilində ali və orta ixtisas təhsili müəssisələrinə qəbul olunan tələbələrin təhsil müəssisələrində elektron qeydiyyatına və sosial baxımdan həssas əhali qrupuna aid edilən ailələrin üzvü olan tələbələrin təhsil haqqı xərclərinin dövlət tərəfindən ödənilməsinə dair müraciətlərin qəbulunu aktivləşdirib. Hazırda müraciətlərin qəbulu və emalı prosesi davam edir.
Bölmənin digər xəbərləri
