TEYMUR RƏCƏBOV VƏ ŞƏHRİYAR MƏMMƏDYAROV FİDE-NİN DÜNYA KUBOKUNDA İŞTİRAK EDƏCƏKLƏR
AZƏRTAC xəbər verir ki, noyabrın 27-də Xantı-Mansıda başlanacaq FİDE-nin birinci Dünya kubokunda Azərbaycanı qrossmeysterlər Teymur Rəcəbov və Şəhriyar Məmmədyarov təmsil edəcəklər. 48 ölkədən 128 şahmatçının iştirakı ilə olimpiya sistemi üzrə keçiriləcək turnirdə tanınmış qrossmeysterlər - ABŞ şahmatçısı Qata Kamski, rusiyalılar Aleksandr Qrişşuk, Aleksandr Xalifman, ukraynalı Vasili İvançuk və Ruslan Ponomaryov, israilli Boris Gelfand və İlya Smirin də yarışacaqlar.
Ümumi mükafat fondu 1 milyon 572 min dollar olan yarışda 2007-ci il dünya çempionatının finalında iştirak hüququ uğrunda mübarizə aparacaq namizədlər müəyyən ediləcəklər.
Teymur Rəcəbov birinci turda argentinalı Diyeqo Floreslə, Şəhriyar Məmmədyarov isə qazaxıstanlı Nurlan İbrayevlə görüşəcəkdir.
Bölmənin digər xəbərləri
