TKTA: Xaricdə təhsil alan 67 nəfərin müraciəti mənfi qərarla yekunlaşıb
Bakı, 4 sentyabr, AZƏRTAC
Xaricdə təhsil alanların diplomlarının tanınması ilə bağlı avqust ayı üzrə 783 müraciətçinin 716-sı barədə müsbət qərar verilərək müvafiq şəhadətnamələr təqdim edilmiş, 67 nəfərin müraciəti isə mənfi qərarla yekunlaşıb.
Bu barədə AZƏRTAC-a Təhsildə Keyfiyyət Təminatı Agentliyindən məlumat verilib. Bildirilib ki, tədris yükünü mənimsəmək üçün təhsil aldığı ölkənin ərazisində kifayət qədər olmaması səbəbi ilə 60, dövlət nümunəli olmayan diplom səbəbilə 6, akkreditasiyasız ali təhsil müəssisəsi səbəbi ilə 1 nəfərin müraciəti mənfi qərarla yekunlaşıb.
Ölkələr üzrə müraciətlərin sayına nəzər saldıqda Ukraynadan 333, Rusiyadan 228, Türkiyədən 78, Belarusdan 54, Gürcüstandan 44, digər ölkələrdən isə 46 müraciətin olduğu müşahidə olunur.
Ən çox müraciət olunan ixtisaslara gəlincə, hüquqşünaslıq 99, maliyyə üzrə 74, yanğın təhlükəsizliyi mühəndisliyi 74, iqtisadiyyat üzrə 72, həyat fəaliyyətinin təhlükəsizliyi mühəndisliyi üzrə 49 müraciət qeydə alınıb.
Dövlət İmtahan Mərkəzi tərəfindən avqust ayında təşkil olunmuş peşə tanınması imtahanında iştirak edən 261 müraciətçinin 42 faizi imtahanda uğurlu nəticə göstərərək akademik və peşə tanınması ilə bağlı şəhadətnamə əldə etmiş, müraciətçilərin 58 faizi isə imtahanda keçid balı toplamamış və yalnız akademik tanınma ilə bağlı şəhadətnamə əldə ediblər.
Sənədlərə orta hesabla baxılma müddəti 8 iş günü ərzində olub.
Bölmənin digər xəbərləri
