Torpaqlarımızın düşmən işğalından azad edilməsi ilə soyqırımı qubanlarının da ruhu şad oldu
Bakı, 31 mart, AZƏRTAC
1918-ci ildə martın 30-dan aprelin 3-dək erməni cəlladları tərəfindən azərbaycanlılara qarşı törədilən soyqırımı aktından 103 il ötür. Tariximizin ötən 200 ilinə nəzər yetirdikdə, ermənilərin zaman-zaman Azərbaycan xalqına qarşı qanlı faciələr törətdiyinin şahidi oluruq. Mart soyqırımı Bakı Sovetinin mandatı altında fəaliyyət göstərən erməni daşnak-rus bolşevik silahlı dəstələrinin azərbaycanlılara qarşı törətdikləri kütləvi qırğındır. 1918-ci ildə baş vermiş bu soyqırımı aktına 80 il sonra - 1998-ci ildə ümummilli lider Heydər Əliyevin rəhbərliyi dövründə hüquqi-siyasi qiymət verilib.
Bunu AZƏRTAC-a açıqlamasında Milli Məclisin deputatı Tamam Cəfərova deyib.
Deputat bildirib ki, 1918-1920-ci illər Birinci Dünya müharibəsindən sonra Rusiyada yaranmış vəziyyətdən istifadə edən faşist xislətli ermənilər öz niyyətlərini bolşevizm bayrağı altında həyata keçirməyə müvəffəq oldular. 1918-ci ilin mart-aprel aylarında Bakı, Şamaxı, Quba, Muğan və Lənkəranda ermənilər 30 mindən çox azərbaycanlını qətlə yetirərək, 10 minlərlə insanı öz torpaqlarından qovublar. Təkcə Bakıda 10 minə yaxın azərbaycanlı xüsusi qəddarlıqla öldürülüb, Şamaxıda 58 kənd dağıdılıb, 7 min nəfər (1653 qadın, 965 uşaq) məhv edilib. Quba ərazisində 122, Qarabağın dağlıq hissəsində 150, Zəngəzurda 115, İrəvan quberniyasında 211, Qars əyalətində 92 kənd yerlə yeksan olunub, əhali üzərində yaş və cinsə məhəl qoymadan qətliam həyata keçirilib.
Tamam Cəfərova qeyd edib ki, həmin dövrdə Azərbaycan xalqına qarşı törədilmiş bu qanlı cinayətlərə hüquqi-siyasi qiymət verilməsi və hadisələrin araşdırılması üçün Azərbaycan Xalq Cümhuriyyəti (AXC) Nazirlər Şurası tərəfindən 1918-ci il iyulun 15-də bu faciənin tədqiqi məqsədilə Fövqəladə İstintaq Komissiyası yaradılıb. Bununla yanaşı, 1919-cu və 1920-ci illərdə martın 31-i Azərbaycan Xalq Cümhuriyyəti tərəfindən ümummilli matəm günü kimi qeyd edilib. Əslində, bu, azərbaycanlılara qarşı həyata keçirilən soyqırımı və bir əsrdən artıq davam edən torpaqlarımızın işğalı proseslərinə tarixdə ilk dəfə siyasi qiymət vermək cəhdi idi. Lakin Cümhuriyyət tərəfindən mart hadisələrinə verilən siyasi qiymət mövcud şəraitdə sonadək həyata keçirilmədi. Bununla yanaşı, Azərbaycan Xalq Cümhuriyyətinin varisi kimi Azərbaycan Respublikası bu gün onun həyata keçirə bilmədiyi qərarların məntiqi davamı olaraq soyqırımı hadisələrinə siyasi qiymət vermək borcunu tarixin hökmü kimi qəbul edərək, bu mühüm missiyanı məharətlə reallaşdırdı. İlk dəfə 1998-ci il martın 26-da ulu öndər Heydər Əliyevin imzaladığı “Azərbaycanlıların soyqırımı haqqında” Fərmana əsasən 31 mart Azərbaycanlıların Soyqırımı Günü elan edilib. Beləliklə, ermənilər tərəfindən törədilmiş həmin dəhşətli hadisələrə hüquqi-siyasi qiymət verildi.
Diqqətə çatdırılıb ki, dövlətimiz 31 mart hadisələri ilə bağlı həqiqətlərin dünya ictimaiyyətinə çatdırılması istiqamətində müvafiq addımlar atıb. Erməni-bolşevik silahlı dəstələrinin azərbaycanlılara qarşı törətdikləri bəşəri cinayətlər barədə həqiqətlərin ölkə və dünya ictimaiyyətinə daha dolğun çatdırılması məqsədilə Azərbaycan Respublikası Prezidenti İlham Əliyev 2018-ci il yanvarın 18-də “1918-ci il azərbaycanlıların soyqırımının 100 illiyi haqqında” Sərəncam imzalayıb.
Vurğulanıb ki, Azərbaycan xalqı erməni faşistlərinin iç üzünü Vətən müharibəsində bir daha gördü. Ermənilər dinc əhaliyə qarşı qadağan olunmuş silahlardan istifadə etməklə vandal, nasist simalarını bütün dünyaya bir daha nümayiş etdirdilər. 44 günlük Vətən müharibəsində Gəncə və Bərdə şəhərlərinə atılan bombalar nəticəsində 54 nəfər həyatını itirib, 195 nəfər isə yaralanıb. Gəncə və Bərdə hadisələri siyasi baxımdan Azərbaycan xalqına qarşı törədilmiş cinayətlərin davamı kimi qiymətləndirilməlidir.
Bütün bunlar onu deməyə əsas verir ki, faşist ideologiyasına xidmət edən ermənilər Azərbaycan və türk xalqına qarşı hər zaman düşmən mövqedə olublar. Hər zaman saxta faktlar yaradaraq tarixi saxtalaşdırmağa çalışıblar. Prezident İlham Əliyev qeyd etdiyi kimi, tarixi necə saxtalaşdırıblar, reallığı da elə saxtalaşdırıblar. Dünyanın müxtəlif yerlərində fəaliyyət göstərən ermənilərin şəbəkələri saxta məlumat yaymaqla məşğuldurlar və olmayan şeyləri reallıq kimi qələmə verirlər. Əlbəttə, hər bir azərbaycanlı düşmənin məkrli siyasətinə qarşı ayıq olmalı, dövlətin atdığı addımların arxasında olmalıdır.
Qeyd olunub ki, Azərbaycan xalqı tarixboyu bir çox faciələrlə üzləşməsinə baxmayaraq, özünün müstəqillik əzmini qoruyub saxlayıb, yenilməz birlik və həmrəylik nümayiş etdirib. Xüsusilə Prezident, Müzəffər Ali Baş Komandan İlham Əliyevin və ordumuzun ətrafında “dəmir yumruq” kimi birləşən Azərbaycan xalqı gücünün, qüdrətinin nələrə qadir olduğunu düşmənə və bütün dünyaya bir daha nümayiş etdirdi. Artıq bütöv Azərbaycan var və Böyük Qayıdışın astanasındayıq. 44 günlük Vətən müharibəsində Azərbaycan ərazi bütövlüyünü təmin etməklə yanaşı, tarixi ədaləti də bərpa etdi. Torpaqlarımızın düşmən işğalından azad olunması ilə soyqırımı qurbanlarının ruhu şad oldu.
Bölmənin digər xəbərləri
