Tramp Hindistana və Türkiyəyə ticarət preferensiyalarını ləğv etməyi planlaşdırır
Vaşinqton, 5 mart, AZƏRTAC
Prezident Tramp ABŞ Konqresinə yazılı şəkildə müraciət edərək Hindistanı və Türkiyəni ticarət preferensiyalarından məhrum etmək istədiyini bildirib.
AZƏRTAC xəbər verir ki, Ümumi Preferensiyalar Sistemi (GSP) Proqramı çərçivəsində Hindistanın Birləşmiş Ştatlara 5,6 milyard dollar məbləğində məhsulu rüsumsuz gətirməsinə icazə verilib. 2017-ci ildə Türkiyədən ABŞ-a 1,66 milyard dollar məbləğində məhsul rüsumsuz idxal edilib. Bu, Türkiyədən ABŞ-a idxalın ümumi həcminin təqribən 17,7 faizi deməkdir.
Tramp öz məktubunda qeyd edib ki, Hindistan hökuməti ilə intensiv danışıqlardan sonra bu addımı atmaq qərarına gəlib. Onun sözlərinə görə, “Hindistan Birləşmiş Ştatlar üçün Hindistan bazarlarına müvafiq ədalətli girişi təmin edəcəyinə inandıra bilməyib”.
Tramp Türkiyənin ticarət preferensiyalarından məhrum edilməsi barədə qərarını bununla əsaslandırıb ki, Türkiyə “iqtisadi cəhətdən yetərincə inkişaf edib, buna görə da o, Birləşmiş Ştatlar bazarına güzəştli giriş imkanından istifadə etməli deyil”.
Türkiyə və Hindistan GSP Proqramında iştirak edən 120 ölkənin siyahısına daxildir. Qanuna əsasən bu dəyişikliklərin qüvvəyə minməsi üçün azı 60 gün əvvəldən ABŞ Konqresi, həmçinin Hindistan və Türkiyə hökumətləri bu barədə məlumatlandırılmalı və dəyişikliklər Prezident proklamasiyası ilə təsdiq edilməlidir. GSP Proqramına əsasən, iqtisadi cəhətdən inkişaf etməkdə olan ölkələr üçün Dünya Ticarət Təşkilatı çərçivəsində birtərəfli ticarət güzəştləri nəzərdə tutulur.
Yusif Babanlı
AZƏRTAC-ın xüsusi müxbiri
Vaşqinton
Bölmənin digər xəbərləri
