İQTİSADİYYAT
TRASEKA: Beynəlxalq avtomobil daşımaları regionda nəqliyyat sahəsinin inkişafının hərəkətverici amilidir
Bakı, 15 sentyabr, AZƏRTAC
Beynəlxalq Avtomobil Nəqliyyatı İttifaqının (IRU) Şərq-Qərb və Şimal-Cənub multimodal dəhlizləri boyunca regional nəqliyyat əlaqələrinin və tranzitinin inkişafı kontekstində avtomobil nəqliyyatı sektorunun əsas problemlərinə və imkanlarına, nəqliyyatın rəqəmsallaşdırılması, kommersiya və gömrük prosedurlarına həsr olunmuş konfransı keçirilib.
AZƏRTAC TRASEKA-nın məlumatına istinadla xəbər verir ki, konfransda IRU-ya üzv assosiasiyalar, Avrasiya regionunda və onun hüdudlarından kənarda fəaliyyət göstərən nəqliyyat şirkətləri, beynəlxalq təşkilatlar, inkişaf tərəfdaşları, beynəlxalq maliyyə institutları və digər maraqlı tərəflər iştirak ediblər.
Konfransın plenar iclasında böhran dövründə nəqliyyat zəncirlərinin davamlılığı və dünyanın müxtəlif regionlarında avtomobil nəqliyyatının rolunun yenidən nəzərdən keçirilməsinin zəruriliyi ilə bağlı müzakirələr aparılıb.
Müzakirələr çərçivəsində TRASEKA Hökumətlərarası Komissiyası (PS IGC) Daimi Katibliyinin baş katibi Aset Asavbayev hazırda katibliyin üzərində işlədiyi cari təşəbbüslər, o cümlədən multimodal daşımaların daha da təkmilləşdirilməsinə dair planlar barədə danışıb. O əlavə edib ki, TRASEKA ölkələrini Xəzər və Qara dənizlər birləşdirir, bu proqram regionların nəqliyyat infrastrukturunun əlaqəsini təmin edir.
“Multimodal daşımaların inkişafı sənayenin karbonsuzlaşdırılmasına mühüm töhfə verir və bu, ildən-ilə aktuallaşır. Atmosferə atılan tullantıların azaldılmasına birbaşa təsir edən digər təşəbbüs yarımqoşqu və kontreyl yükdaşıyan qatarlar ilə yükdaşımalarının inkişafıdır”, - deyə Aset Asavbayev qeyd edib.
Onun sözlərinə görə, yarımqoşqularla yüklərin daşınması daha ucuz yükdaşıma növünü təmin etmək üçün böyük potensiala malikdir. Baş katib əlavə edib: “Lakin bu gün iki əsas maneə subpodrat müqaviləsi üzrə daşımalarla bağlı TİR Konvensiyasının (beynəlxalq yükdaşımaları - red.) müddəalarının məhdud tətbiqi və icazələrin alınması zərurətidir. Bütün 14 marşrut ölkəsindən yalnız beşinin subpodratçı müqavilələrində TİR-dan istifadə etmək imkanı var. Eyni zamanda, demək olar ki, bütün Orta Asiya ölkələri malların daşınması zamanı icazə almalıdır. Üstəlik, Mərkəzi Asiya ölkələrinin heç də hamısının marşrut ölkələri ilə avtomobil daşımaları ilə bağlı müqavilələri yoxdur ki, bu da yarımqoşqularla yüklərin daşınması yolu ilə həll oluna bilər. Odur ki, TRASEKA çərçivəsində yarımqoşqularla yükdaşımaların inkişafına dair saziş layihəsi (ilkin sənəd layihəsi - red.) hazırlanır ki, burada daşıma şərtlərindən biri icazələr almaq ehtiyacından tam azad ola bilər. Ümid edirəm ki, TRASEKA ölkələri bu təşəbbüsü dəstəkləyəcək”.
İkinci sessiyada iştirakçılar avtonom nəqliyyat vasitələrinə keçid zamanı sürücü çatışmazlığının həlli yollarını müzakirə ediblər. Amerika, Asiya və Avropada 2,6 milyondan çox peşəkar sürücü çatışmazlığı var. Problem onsuz da gərgin olan iqtisadiyyatlar və əhali üçün inflyasiya, sosial hərəkətliliyin və təchizat zəncirinin pozulması ilə bağlı əlavə risklər yaradır.
Konfransda, həmçinin ticarət və nəqliyyatın inkişafı sahəsində tanınmış nümayəndələrin, eləcə də Beynəlxalq Avtomobil Nəqliyyatı İttifaqının “New Industry Shapers” layihəsinin avtomobil nəqliyyatı sənayesinin inkişafında yeni tendensiyaları formalaşdıran mütərəqqi iştirakçılarının iştirakı ilə IRU-nun 75 illiyinə həsr olunmuş xüsusi sessiya keçirilib.
Tədbirin sonunda TRASEKA Hökumətlərarası Komissiyası Daimi Katibliyinin baş katibi Özbəkistanın Beynəlxalq Avtomobil Daşıyıcıları Assosiasiyasına (AIRCUZ) və IRU-ya xatirə suvenirləri təqdim edib.