“Troya qalxanı” aksiyası çərçivəsində Avstriyada 13 cinayətkar həbs olunub
Vyana, 9 iyun, AZƏRTAC
Mütəşəkkil cinayətkarlığa qarşı Avropol və ABŞ-ın Federal Təhqiqatlar Bürosunun rəhbərliyi ilə həyata keçirilən “Troya qalxanı” aksiyası çərçivəsində Avstriyada 81 nəfər saxlanılıb.
AZƏRTAC xəbər verir ki, Avstriyanın daxili işlər və ədliyyə nazirləri birgə mətbuat konfransında bu barədə məlumat veriblər. Bildirilib ki, manipulyasiya edilmiş mobil telefonların kriminal dəstələr tərəfindən istifadəsini təmin edən təhqiqatçılar 18 aydan artıq dövrdə dünyanın 16 ölkəsində cinayətkarların fəaliyyətini izləyiblər. İyunun 8-də barəsində ilk məlumatların verildiyi əməliyyat çərçivəsində cinayətkar qruplaşmalar polislə əlbir agentlərin onlara təqdim etdiyi telefonların etibarsız olduğundan şübhələnməyiblər.
Aksiya çərçivəsində təkcə Avstriyada 67 mənzildə aparılan əməliyyat-axtarış işləri nəticəsində 81 nəfər saxlanılıb, 707 kiloqram narkotik vasitə, 35 silah və 650 min avro nəqd pul müsadirə edilib. Saxlanılan şəxslərdən 13 nəfəri barədə həbs qətimkan tədbiri seçilib və istintaq başlanılıb.
Qeyd edilməlidir ki, aksiya çərçivəsində hüquq-mühafizə orqanları dünyanın müxtəlif ölkəsində fəaliyyət göstərən 300 cinayətkar qruplaşmanın 12 min mobil telefonlarını dinləyib və 27 milyon mesaj filtrasiyadan keçib. Bütün dünya üzrə 800 cinayətkar əməliyyat çərçivəsində həbs olunub.
Aksiya çərçivəsində ilk olaraq Avstraliyada cinayətkar qruplaşmalara ANOM qapalı şəbəkəsində məxfi kommunikasiya imkanı yaradan mobil telefonlar təqdim olunub. Onlara bu telefonlarla aparılan danışıqların dinlənilməsinin və geolokasiyanın təyin edilməsinin mümkün olmadığı, eləcə də təhlükə anında telefondakı həssas məlumatları birdəfəlik silə bilən işlək “Killswitch“ tətbiqi ilə təmin olunduqlarına dair vədlər verilib. Əslində, polisin nəzarətindəki qapalı şəbəkəyə bağlı olan telefonlar qısa müddət ərzində kriminal aləmdə populyarlaşıb və qısa zamanda 12 minədək belə mobil telefon cinayətkarlar tərəfindən istifadə olunub. Uzun illərdən bəri cinayətkarlar tərəfindən istifadə edilən “Phantom Secure”, “Sky Global”, “Ciphr” və ya “EncroChat” kodlaşdırılmış şəbəkələri nümunəsi əsasında yaradılan yeni şəbəkədən istifadə edən cinayətkar qruplaşmalar, əslində, hüquq-mühafizə orqanlarının tərtib etdiyi tələdən xəbərsiz olublar.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
