Tunisin Nabul vilayətindən heyvandarlıq məhsullarının idxalına məhdudiyyət qoyulub
Bakı, 12 dekabr, AZƏRTAC
Ümumdünya Heyvan Sağlamlığı Təşkilatının rəsmi məlumatına əsasən Tunis Respublikasının Nabul vilayətində dabaq xəstəliyi qeydə alınıb.
Bu barədə AZƏRTAC-a Qida Təhlükəsizliyi Agentliyinin İnformasiya təminatı və innovativ həllər şöbəsindən məlumat verilib.
Respublika ərazisinin qeyd olunan yoluxucu xəstəlikdən qorunması üçün Nabul vilayətində zonalaşma prinsipi nəzərə alınmaqla, dabaq xəstəliyi baş vermiş təsərrüfatın 10 kilometr radiusda olan məsafədən cütdırnaqlı heyvanların (iri və xırdabuynuzlu heyvanlar, donuz, dəvə və s.), habelə onlara aid xammal və məhsulların idxalına və tranzit daşınmasına WOAH-nin “Quruda yaşayan heyvanların sağlamlıq Məcəlləsi”nə uyğun olaraq müvəqqəti məhdudiyyət tətbiq olunub.
Eyni zamanda, nəzarət tədbirlərinin gücləndirilməsi məqsədilə qeyd olunan inzibati ərazi vahidindən gələn, yaxud tranzitlə keçib respublikamıza daxil olan nəqliyyat vasitələri ilə bağlı müvafiq tədbirlərin görülməsi üçün Dövlət Gömrük Komitəsinə müraciət edilib.
Bölmənin digər xəbərləri
