Astana, 25 noyabr, AZƏRTAC

Azərbaycan bizim illərlə səmərəli əməkdaşlıq etdiyimiz qardaş ölkədir. Münasibətlərin möhkəmlənməsi birgə fəaliyyətə keçid, qüvvələrin birləşdirilməsi üçün möhkəm zəmin yaradıb.

Bu barədə AZƏRTAC-a Türkdilli Ölkələrin Ticarət və Sənaye Palataları İttifaqı nəzdində fəaliyyət göstərən Türkdilli Dövlətlərin Sahibkar Qadınlar Şurasının Türkiyədən olan üzvü Hatice Güner Kal məlumat verib.

Onun sözlərinə görə, Türkiyə və Azərbaycanın demoqrafik strukturu kişi və qadın əhalinin bərabər nisbəti ilə xarakterizə olunur. Ölkələrin rifahı qadınların iqtisadi fəaliyyətdə fəal iştirakı ilə qırılmaz şəkildə bağlıdır.

“İqtisadi rifaha nail olmaq yalnız bütün cəmiyyətin potensialını birləşdirmək yolu ilə mümkündür. Qadın sahibkarlığının inkişafı bu prosesdə mühüm rol oynayır”, - deyə o, Astanada keçirilən Türkdilli Ölkələrin Qadın Sahibkarlarının Biznes Forumu çərçivəsində vurğulayıb.

H.Güner Kal qeyd edib ki, sahibkarlıq ölkələrdə iqtisadi artımın əsas amilinə çevrilir. O əlavə edib: “Diqqətimiz rəqəmsallaşma, marketinq, süni intellekt və yaşıl transformasiya kimi inkişaf sahələrinə yönəlib. Biz geniş yaş kateqoriyasını əhatə edən layihələr həyata keçiririk. Kişilər və qadınlar arasında fiziki fərqlərə baxmayaraq, onların iqtisadi potensialı bərabərdir. Məqsədimiz isə iqtisadi sahədə bərabərliyi təmin etməkdir”.

Türkiyə nümayəndəsi digər türk dövlətləri ilə sahibkarlıq və brendinq məsələlərində fəal dialoqun aparıldığını da bildirib.

“Birgə işimizin uğuruna əminəm, çünki birliyimiz gələcək nailiyyətlərin açarıdır”, - deyə H.Güner Kal sözlərini yekunlaşdırıb.

Elşən Rüstəmov

AZƏRTAC-ın xüsusi müxbiri

Astana