DÜNYA
Türkiyə Respublikasının Vitse-prezidenti İstanbuldakı zəlzələ ilə bağlı açıqlama verib
İstanbul, 27 sentyabr, AZƏRTAC
Türkiyə Respublikasının Vitse-prezidenti Fuat Oktay İstanbuldakı zəlzələ ilə bağlı açıqlama verib.
AZƏRTAC-ın məlumatına görə, açıqlamada Türkiyənin Fövqəladə Halların İdarə Olunması Agentliyi (AFAD) tərəfindən şəhərdə baş vermiş 5,8 bal gücündə yeraltı təkanlarla bağlı aparılan son araşdırmalar haqqında məlumat verilib. Bildirilib ki, hadisə nəticəsində 34 nəfər yaralanıb. Onlardan onunun müalicəsi davam edir. Digər 24 nəfər isə ilkin tibbi yardım göstərildikdən sonra evə buraxılıb.
Məlumatda hadisə nəticəsində 473 binanın zərər gördüyü bildirilir. Bu binaların əksəriyyətində yüngül çatlar meydana gəlib. Tikililərin 55-i məktəb binasıdır ki, onların da 14-də ətraflı araşdırılma aparılması üçün mütəxəssislər cəlb edilib. Qeyd edilən məktəblərdə bu gün tətil elan edilib. İstanbul və ətraf bölgələrdə yerləşən digər 7 min 46 məktəb binasında isə heç bir zədə aşkar olunmayıb.
Fuat Oktay dünən yerli vaxtla saat 13:59-da baş vermiş 5,8 bal gücündə yeraltı təkanlardan sonra 188 afterşokun qeydə alındığını bildirib.
Günel Məlikova
AZƏRTAC-ın xüsusi müxbiri
İstanbul