Türkiyə XİN: Yunanıstanın “Dəniz Məkanlarının Planlaşdırılması”nda göstərdiyi bəzi ərazilər Türkiyənin dəniz yurisdiksiyasını pozur
İstanbul, 16 aprel, Günel Karatepe, AZƏRTAC
Yunanıstanın Avropa İttifaqı (Aİ) qanunvericiliyinə uyğun olaraq elan etdiyi “Dəniz Məkanlarının Planlaşdırılması” çərçivəsində Egey və Şərqi Aralıq dənizlərində göstərilən bəzi ərazilər Türkiyənin dəniz yurisdiksiyasını pozur.
AZƏRTAC xəbər verir ki, bu barədə Türkiyənin Xarici İşlər Nazirliyinin (XİN) açıqlamasında bildirilib.
Açıqlamada Yunanıstanın birtərəfli addımları və iddialarının Türkiyə baxımından heç bir hüquqi nəticə doğurmayacağı bir daha vurğulanıb.
Türkiyə XİN Egey və Aralıq dənizi kimi qapalı və ya yarımqapalı dənizlərdə birtərəfli addımlardan çəkinməyin zəruriliyini vurğulayıb. Eləcə də beynəlxalq dəniz hüququnun ətraf mühit məsələləri də daxil olmaqla, bu kimi dənizlərdə sahilyanı dövlətlər arasında əməkdaşlığı təşviq etdiyi və bu kontekstdə Türkiyənin Egey dənizində Yunanıstanla əməkdaşlığa hər zaman hazır olduğu xatırladılıb.
Açıqlamada bildirilib ki, Türkiyə Yunanıstanla hər iki tərəfin münasibətlərində saxlamaq istədikləri mövqeyi əks etdirən, 2023-cü il dekabrın 7-də imzalanmış “Dostluq Münasibətləri və Yaxşı Qonşuluq haqqında Afina Bəyannaməsi” çərçivəsində, eləcə də beynəlxalq hüquq, ədalət və mehriban qonşuluq əsasında məsələlərin həlli üçün səmimi və əhatəli yanaşmanın qəbul edilməsi mövqeyini qoruyur. Türkiyə tərəfindən hazırlanan “Dəniz Məkanlarının Planlaşdırılması” sənədi həm UNESCO-ya, həm də BMT-nin aidiyyəti qurumlarına təqdim olunub.
Bölmənin digər xəbərləri
