Türkiyədə evdən çıxmaq qadağası 34,4 milyon insanı əhatə edir
İstanbul, 4 aprel, AZƏRTAC
Türkiyədə koronavirus pandemiyası ilə mübarizə tədbirləri çərçivəsində yaşı 20-dən aşağı və 65-dən yuxarı olan vətəndaşlar üçün tətbiq olunan küçəyə çıxmaq qadağası 34,4 milyon insanı əhatə edir.
AZƏRTAC xəbər verir ki, Türkiyənin Statistika Komitəsinin son hesablamalarına əsasən, ölkə vətəndaşlarının ümumi sayı 83 milyon 154 min 997 nəfərdir. Onların 26,9 milyonu 20 yaşdan aşağı, 7,5 milyonu isə 65 yaşdan yuxarı olanlardır. Beləliklə ölkədə tətbiq olunan evdən çıxmaq qadağası 34,4 milyon insanı əhatə edir.
Bundan əlavə, hazırda giriş-çıxışlara qadağa qoyulan 31 şəhərdə ümumilikdə 65,3 milyon insan yaşayır. Bu şəhərlər arasında ən çox - 15,5 milyon əhalisi olan İstanbulda təxminən 5,8 milyon insan qadağa qrupuna aid edilir. Ümumiyyətlə ən çox yoluxma halının qeydə alındığı İstanbul, İzmir, Ankara, Konya və Kocaeli şəhərlərində gənc və yaşlı nəsil çoxluq təşkil edir.
Günel Məlikova
AZƏRTAC-ın xüsusi müxbiri
İstanbul
Bölmənin digər xəbərləri
