Türkiyədə “İslam mədəniyyətində birgəyaşayış təcrübəsi” mövzusunda beynəlxalq simpoziumun açılışı olub
Bakı, 6 oktyabr, AZƏRTAC
Türkiyədə Kırıkkale Universitetinin İslam elmləri fakültəsi, İslam Ölkələri Tətbiq və Araşdırma Mərkəzi, Azərbaycan İlahiyyat İnstitutu (Aİİ), İndoneziya Sunan Kalijaga Yogyakarta Dövlət İslam Universiteti və Mənəvi Dəyərlərin Təbliği Fondunun birgə təşkilatçılığı ilə “İslam mədəniyyətində birgəyaşayış təcrübəsi” mövzusunda II beynəlxalq simpoziumun açılış mərasimi olub.
Əvvəlcə Türkiyə və Azərbaycanın Dövlət himnləri səsləndirilib.
Kırıkkale Universiteti İslam elmləri fakültəsinin tələbəsi Məhəmməd Əmin Coşkunun “Qurani-Kərim” tilavəti ilə tədbir davam edib.
Bu barədə AZƏRTAC-a Azərbaycan İlahiyyat İnstitutundan məlumat verilib.
Türkiyə, Azərbaycan və digər ölkələrdən müvafiq qurumların nümayəndələrinin, alim və mütəxəssislərin iştirak etdikləri simpoziumda çıxış edən Təşkilat Komitəsinin sədri professor Şahin Əhmədoğlu bildirib ki, fərqli dinlərə, dillərə, irqlərə, rənglərə sahib insanlar dünyada birgə yaşayırlar. İslam dininin məqsədi ağıldan istifadə edən, qanuna və hüquqlara əməl edən, ədalətli, fikir azadlığına və yaşamaq hüququna hörmət göstərən, mərhəmətli, bağışlayan insan yetişdirməkdir. Ş.Əhmədoğlu vurğulayıb ki, İslam sivilizasiyasının bir parçası olan Türkiyə müsəlman ölkələri arasında strateji mövqeyinə görə mühüm missiyaya malikdir. O, belə bir tədbirin Türkiyə və Azərbaycanın birgə keçirməsinin əhəmiyyətini vurğulayıb. Bildirilib ki, simpoziumda 14 ölkədən və Türkiyənin müxtəlif universitetlərindən 100-dən çox alim məruzə ilə çıxış edəcək.
Kırıkkale Universiteti İslam elmləri fakültəsinin dekanı professor Mövlud Erten deyib: Təcrübə ilə sübut olunur ki, cəmiyyətlər öz gələcəklərini düşünüb bu anlayışla hərəkət etsələr, möhtəşəm və tarixi cəmiyyətlər yarana bilər. İslam sivilizasiyası tarixdə birgəyaşamağın qaydasını, qanununu və modelini ən gözəl şəkildə ortaya qoymuş nümunədir. Birlikdəyaşamanın ilk nümunələrini Quranda, Həzrət Peyğəmbərin dövründə müşahidə edirik. Müsəlmanlar bu nümunələrə əsaslanaraq, tarixdə misli görünməmiş gözəl əməllər və birlikdəyaşama nümunələrini ortaya qoyublar”.
Azərbaycanda müxtəlif dinlərin, fərqli etnik qrupların yüzillərboyu sülh şəraitində, çətin anlarda bir-birlərinə dəstək verərək yaşadıqlarını müasir və tarixi nümunələrlə izah edən Azərbaycan Respublikası Dini Qurumlarla İş üzrə Dövlət Komitəsi sədrinin birinci müavini Səyyad Salahlı respublikamızda multikultural həyatın 23 müxtəlif ölkədə akademik şəkildə öyrənildiyini və mühazirələrdə izah edildiyini vurğulayıb. Sədr müavini bildirib ki, İslam ölkələrində tarixboyu müxtəlif din və inanclardan olan insanlar sülh şəraitində yaşayıblar. İslam dünyasında fərqlidüşüncəli insanların bir yerdə yaşamalarına, fikirayrılıqlarına hörmətlə yanaşılmasına böyük əhəmiyyət verilir.
Azərbaycan İlahiyyat İnstitutunun rektoru dosent Aqil Şirinov Azərbaycan Prezidenti, Ali Baş Komandan İlham Əliyevin rəhbərliyi, şanlı Ordumuzun gücü ilə Vətən müharibəsində böyük Zəfər qazandığımızı, torpaqlarımızın işğaldan azad olunduğunu bildirib. A.Şirinov vurğulayıb ki, “Qurani-Kərim”in bir yerində birgəyaşamanın nəzəri prinsiplərinə rast gəlirik. İslam mədəniyyətinə nəzər saldıqda beytül-hikmənin Abbasilər dövründə qurulduğunu görürük.
Birgəyaşama təcrübəsinin İslam sivilizasiyasının mühüm prinsiplərindən biri olduğunu bildirən Mənəvi Dəyərlərin Təbliği Fondunun icraçı direktoru Mehman İsmayılov vurğulayıb ki, İslam dünyasının zəngin irsinin təbliğinə böyük ehtiyac var. Biz bu dəyərli irsimizi təbliğ etməyə çalışmalıyıq.
Kırıkkale Universitetinin rektoru professor Ersan Aslan simpoziumun gənclərə İslam sivilizasiyasında birgəyaşayış ənənəsi haqqında bir çox bilgilərin çatdırılması üçün önəmli platforma rolunu oynayacağına ümid etdiyini bildirib.
Sonra Ankara Universiteti İlahiyyat fakültəsinin müəllimi professor Sönməz Kutlu “Birgəyaşayışın konseptual çərçivəsi” mövzusunda məruzə edib.
Qeyd edək ki, simpoziumun ilk iki günündə cəmiyyət, təhsil və İslamın əsas mövzuları çərçivəsində 103 məruzə dinləniləcək.
Tədbirin keçirilməsində məqsəd İslam mədəniyyəti kontekstində fərqli din nümayəndələrinin birgəyaşayışı ilə bağlı vəziyyəti müzakirə etmək; müsəlman cəmiyyətləri arasında bu istiqamətdə mövcud təcrübələrdən yararlanmaq və onları təşviq etməkdir.
Bölmənin digər xəbərləri
