Türkiyədə yeni təhsil ilinə start verilib
İzmir, 8 sentyabr, Günel Karatepe, AZƏRTAC
Türkiyədə builki təhsil prosesi “Ailə” və “Yaşıl Vətən” olmaqla iki əsas mövzu üzərində müəyyənləşdirilib. Bu çərçivədə “Hər uşaq bir ting, ilk dərs yaşıl Vətən” başlığı ilə ilk həftə ölkə məktəblərində bir çox tədbir keçiriləcək. Bundan əlavə, 10 ay davam edən təhsil ili ərzində “Yaşıl Vətən mənim məktəbimdir, gələcəyə çarə” başlığı altında keçiriləcək dərslər iqlim, ətraf mühit və ailə mövzularını əhatə edəcək. Bu dərslər ailələri də prosesə birbaşa daxil etməyi hədəfləyir.
AZƏRTAC xəbər verir ki, bu barədə Türkiyə Prezidenti Rəcəb Tayyib Ərdoğan ölkədə 2025-2026-cı tədris ilinin başlanması münasibətilə keçirilən tədbirdə çıxışı zamanı bildirib. Türkiyədə başlanılan yeni maarif modeli barədə danışan ölkə başçısı deyib: “Yeni maarif modelimizlə biz yalnız insan yetişdirməklə kifayətlənmirik, eyni zamanda, bir sivilizasiya qurmağa çalışırıq”. Prezident Ərdoğan bildirib ki, bu günə qədər Türkiyədə ümumilikdə 4 milyard 78 milyon dərslik şagirdlərə ödənişsiz təqdim olunub. Laboratoriya sayı 21 min 849-dan 49 min 666-ya çatdırılıb. Son 22 ildə elm və incəsənət mərkəzlərinin sayı 20 dəfə artırılaraq 364-ə çatdırılıb. 23 il əvvəl ölkədə cəmi 2 min 791 idman zalı var idi. Hazırda bu rəqəm 12 min 214-ə yüksəlib. 2002-ci ildə təhsilə ayrılan ümumi büdcə cəmi 10,44 milyard lirə olduğu halda, 2025-ci ildə bu rəqəm 2 trilyon 186 milyard lirə təşkil edib.
Bölmənin digər xəbərləri
