Türkiyəli və azərbaycanlı tələbələr Ankarada müasir şəhər mühitinə çoxtərəfli yanaşma məsələlərini müzakirə edirlər
Ankara, 12 noyabr, AZƏRTAC
Noyabrın 11-də Ankara Musiqi və İncəsənət Universitetində Türkiyə və Azərbaycanın müxtəlif universitetlərindən olan 40 tələbənin iştirak etdiyi şəhər landşaft dizaynına çoxtərəfli yanaşmalar üzrə təlim proqramı başlayıb.
AZƏRTAC xəbər verir ki, proqramda Azərbaycanın üç ali təhsil ocağından - Memarlıq və İnşaat Universiteti, Dövlət Rəssamlıq Akademiyası və Xəzər Universitetindən 13 tələbə və beş müəllim iştirak edir. Respublikamızı təmsil edən bəzi tələbələr SABAH qruplarının üzvləridir.
Türkiyəni isə müxtəlif universitetlərdən 27 tələbə və beş müəllim təmsil edir.
SABAH Qrupları İcraiyyə Komitəsinin sədri, Elm və Ali Təhsil üzrə Dövlət Agentliyinin sektor müdiri Elza Səmədova, Ankaradakı Azərbaycan səfirliyinin nəzdindəki Azərbaycan Mədəniyyət Mərkəzinin direktoru Samir Abbasov, Ankara Musiqi və İncəsənət Universitetinin prorektoru Zafer Kurtaslan, həmin universitetin professoru Güzin Ayrancıoğlu və layihənin əlaqələndiricisi Necla Kılınç beynəlxalq təlim proqramının iştirakçıları qarşısında çıxış ediblər.
Tədbirdə ətraf mühit tələblərinə diqqət yetirərək şəhər landşaftlarının dizaynı və davamlı inkişafı üçün mövcud problemlər və həll yolları müzakirə olunub.
E.Səmədova çıxışında bütün müasir tələblərə cavab verən şəhər mühitinin yaradılmasının vacibliyini vurğulayıb. Sektor müdiri qeyd edib ki, bu sahədə dövlət qurumlarının və özəl sektorun birgə səyləri Azərbaycanın dövlət siyasətinin bir hissəsidir. O, ümidvar olduğunu bildirib ki, növbəti belə təhsil təşəbbüsü 2026-cı ildə Azərbaycanın azad edilmiş ərazilərində baş tutacaq.
S.Abbasov, öz növbəsində, Ermənistanın işğalı illərində Azərbaycana dəyən genişmiqyaslı dağıntılara diqqət çəkib. Azərbaycan Mədəniyyət Mərkəzinin direktorunun sözlərinə görə, hökumətimiz respublikanın Qarabağ və Şərqi Zəngəzur iqtisadi rayonlarında şəhər və kəndlərin bərpası da daxil olmaqla çoxsaylı proqram və layihələr həyata keçirir, dəyən ziyanı aradan qaldırmaq üçün bütün səyləri göstərir. “İnsanların ətraf mühitə mənfi təsirini minimuma endirən ilk “ağıllı şəhər” layihələri artıq Zəngilanda həyata keçirilib. Qardaş Türkiyədə toplanmış təcrübə də daxil olmaqla, beynəlxalq təcrübələrin fəal şəkildə öyrənilməsi bu layihələrin həyata keçirilməsini sürətləndirəcək”, - deyən S.Abbasov şəhərsalma sahəsində ortaq standartların hazırlanması üçün iki qardaş ölkənin bələdiyyələri və təhsil müəssisələri arasında əməkdaşlığın vacibliyini vurğulayıb.
Mərkəz direktoru birgə təhsil təşəbbüslərinin Türkiyə və Azərbaycanda şəhərsalmanın gələcəyinə töhfə verəcəyinə ümidvar olduğunu da bildirib.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
