TÜRKİYƏNİN ƏDLİYYƏ NAZİRİ QAFQAZ UNİVERSİTETİNDƏ OLMUŞDUR
AZƏRTAC xəbər verir ki, Türkiyənin ədliyyə naziri Mehmet Əli Şahin ölkəmizə səfəri çərçivəsində sentyabrın 26-da Qafqaz Universitetində olmuşdur.
Universitetin rektoru, professor Əhməd Saniç rəhbərlik etdiyi ali məktəbin fəaliyyəti barədə ətraflı məlumat vermişdir. Burada qazanılan nailiyyətlərdən bəhs edən rektor bu il universitetə qəbul olunan gənclərdən 118 nəfərinin ali təhsil müəssisələrinə qəbul imtahanlarında 600-dən çox bal topladığını söyləmişdir.
Türkiyənin ədliyyə naziri Mehmet Əli Şahin öz ölkəsi ilə Azərbaycanın tarixi əlaqələrindən danışmışdır. Ulu öndər, görkəmli siyasi xadim Heydər Əliyevin “Biz bir millət, iki dövlətik” kəlamını xatırladan nazir, xalqlarımızın mehriban qardaşlıq münasibətlərinin əhəmiyyətini vurğulamışdır. Natiq Azərbaycanın hər sahədə dinamik inkişafını qeyd edərək burada keçirdiyi görüşlərdən məmnun qaldığını bildirmişdir. Nazir müəllim və tələbələrə təhsildə yeni müvəffəqiyyətlər arzulamışdır.
Sonra türkiyəli qonaq tələbələri maraqlandıran suallara ətraflı cavab vermişdir.
Bölmənin digər xəbərləri
